Bu il muxtar respublikada ümumi daxili məhsul istehsalı 3 milyard manatdan çox olub

NUHÇIXAN İnformasiya Agentliyi xəbər verir ki, altıncı çağırış Naxçıvan Muxtar Respublikası Ali Məclisinin altıncı sessiyasında Naxçıvan Muxtar Respublikası Ali Məclisinin Sədri Vasif Talıbov 2021-ci ildə Naxçıvan Muxtar Respublikasının sosial-iqtisadi inkişafının yekunları barədə məruzə edib.

Ali Məclisin Sədri bildirib ki, iqtisadiyyatın əsas inkişaf göstəricisi sayılan ümumi daxili məhsul istehsalı 2020-ci illə müqayisədə 2021-ci ildə 2,4 faiz artaraq 3 milyard manatdan çox olub. Onun hər bir nəfərə düşən həcmi 6525 manat təşkil edib. Bu da 2020-ci ildəki göstəricidən 3,4 faiz çoxdur. Ümumi daxili məhsulun 59 faizdən çoxu istehsalın payına düşüb.

Sahibkarlıq fəaliyyətinin davamlı olaraq dəstəklənməsi və əlverişli biznes mühitinin yaradılmasının muxtar respublikanın istehsal potensialını və məşğulluq səviyyəsini yüksəltdiyini bildirən Ali Məclisin Sədri deyib: “Cari ildə sahibkarlara 31 milyon manata yaxın kredit verilib. Göstərilən maliyyə dəstəyi nəticəsində 120 yeni istehsal və xidmət sahəsi fəaliyyətə başlayıb, il ərzində 52 hüquqi və 2389 fiziki şəxs dövlət qeydiyyatına alınıb”.