Naxçıvan məhsulları “Prodexpo 2022” sərgisində nümayiş olunur - FOTOLAR

NUHÇIXAN İnformasiya Agentliyi xəbər verir ki, bu gün Rusiya Federasiyasının paytaxtı Moskvada “Prodexpo 2022” beynəlxalq sərgisi öz işinə başlayıb. Fevralın 11-dək davam edəcək sərgidə İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan məhsulları “Made in Azerbaijan” vahid ölkə stendində nümayiş etdirilir.

Qida, içki və onların xammalının istehsalı üzrə hər il təşkil olunan sərgidə iştirak edən Naxçıvan şirkətləri də müxtəlif çeşidli məhsullarını sərgiləmək imkanı əldə ediblər. Sərgidə “Ləzzət Qida Sənaye” MMC, “Badamlı Mineral Sular” MMC,  Babək “Sirab” ASC tərəfindən 94 çeşiddə vafli məhsulları, 40 çeşiddə qazlı və qazsız “Badamlı”, “Sirab” mineral suları olmaqla, ümumilikdə 134 çeşiddə məhsul nümayiş olunur.

Qeyd edək ki, 13-17 fevral tarixlərində növbəti “Gulfood 2022” sərgisi keçiriləcəkdir. Sərgidə “Ləzzət Qida Sənaye” MMC, “Badamlı Mineral Sular” MMC, Babək “Sirab” ASC, “Savalan-S” MMC-nin nümayəndələri təmsil olunacaq.

Sərgilər çərçivəsində naxçıvanlı sahibkarlar istehsal etdikləri məhsulları nümayiş etdirməklə yanaşı, xarici iş adamları ilə yeni əməkdaşlıq əlaqələri qurmaq, məhsulların ixracına dair müzakirələr aparmaq imkanı da əldə edəcəklər.