İsrail və Azərbaycan kənd təsərrüfatı sahəsində əməkdaşlığı inkişaf etdirmək üçün strateji plan hazırlayacaqlar - nazir Oded Forer
Biz kənd təsərrüfatı sahəsində əlaqələri inkişaf etdirmək məqsədilə hər iki ölkəyə strateji plan hazırlamaq üçün Azərbaycan hökuməti və İsrail hökuməti tərəfindən iki işçi qrupunun yaradılması təşəbbüsünü irəli sürdük.
NUHÇIXAN İnformasiya Agentliyi xəbər verir ki, bunu jurnalistlərə müsahibəsində İsrailin Azərbaycana səfər etmiş kənd təsərrüfatı və kənd yerlərinin inkişafı naziri Oded Forer deyib.
"İsrail aqrotexnologiyaların istifadəsi və quraq və yarımquraq bölgələrdə kənd təsərrüfatının inkişafı sahəsində geniş biliyə malikdir. Azərbaycan kənd təsərrüfatını bir çox rayonlarda inkişaf etdirmək, çoxlu texnologiyaya malik qabaqcıl kənd təsərrüfatı qurmaq istəyir. Biz bu sahədə əməkdaşlıq edə və Azərbaycana kənd təsərrüfatını daha da inkişaf etdirməyə kömək edə bilərik. Biz artıq Azərbaycanı müasir texnologiyalarla təmin edirik. Ölkədəki bəzi fermerlər İsrail texnologiyasından istifadə edirlər. İsrail şirkətləri Azərbaycanda həm texnologiyadan istifadə, həm də kənd təsərrüfatının inkişafı istiqamətində fəaliyyət göstərirlər. Təbii ki, biz strateji plan hazırlamaqdan danışarkən Azərbaycanın kənd təsərrüfatına daha çox şirkətin, daha çox biliyin, daha çox texnologiyanın cəlb edilməsindən danışırıq", - deyə nazir bildirib.
O.Forer vurğulayıb ki, Bakı Ekspo Mərkəzində keçirilən kənd təsərrüfatı sərgilərində fermerlər də daxil olmaqla hamı hazırda kənd təsərrüfatında hansı texnologiyalardan istifadə olunduğunu gördü.
"İstənilən akr sahədən məhsuldarlığı artıra bilərsiniz. Eyni torpaqda işləyə bilərik, amma daha çox meyvə və tərəvəz əldə edə bilərik. Təbii ki, əgər sizin böyük torpaq sahələriniz varsa, onlardan səmərəli istifadə etməli və bununla da səmərəli və rəqabətədavamlı kənd təsərrüfatını təmin etməlisiniz. Bu, Azərbaycanın kənd təsərrüfatı məhsullarını təkcə daxili bazar üçün deyil, həm də daha çox ixrac edə bilən kənd təsərrüfatı istehsalçısına çevrilməsinə kömək edəcək", - deyə israilli nazir bildirib.
Azərbaycandan İsrailə buğda idxalının perspektivlərindən danışan O.Forer bunun bir neçə il çəkəcəyini qeyd edib.
"Çünki Azərbaycanın qarşısına qoyduğu ilk məqsəd daxili ehtiyaclar üçün buğda istehsalıdır. İndi bütün ölkələrin öz ərzaq təhlükəsizliyindən narahat olduqlarını nəzərə alsaq, bu, mühüm məqsəddir. Azərbaycanda buğda əkmək üçün kifayət qədər torpaq var və təbii ki, müxtəlif torpaqlarda müxtəlif buğda sortlarının yetişdirilməsi və daha çox buğda yetişdirmək üçün texnologiyadan necə istifadə etmək barədə biliklərimiz Azərbaycana kömək edəcək. Əminəm ki, siz daxili bazar üçün lazım olan miqdarda buğda yetişdirə biləcəksiniz və əgər siz daha çox yetişdirsəniz, biz sizdən buğda almağa şad olarıq. Bu, müzakirə etdiyimiz mövzulardan biridir. İsrail bir neçə ölkədən buğda alır və biz idxal mənbələrimizi şaxələndirmək istəyirik. Deməliyəm ki, kənd təsərrüfatı təkcə buğda yetişdirməkdən ibarət deyil. Siz çoxlu meyvə-tərəvəz növləri də yetişdirirsiniz və biz bu istiqamətdə ölkələrimiz arasında ticarəti dərinləşdirmək istərdik", - deyə nazir bildirib.
Nazirin sözlərinə görə, İsrail kənd təsərrüfatı texnologiyaları sahəsində çoxlu biliyə malikdir.
"Biz hər akr torpaqdan istifadə edib, işlədiyimiz hər bir torpaq parçasından daha çox məhsul əldə edə bilərik. Bu isə qida təhlükəsizliyini təmin edir. Söhbət nə yetişdiriləcək, harada yetişdiriləcək və hətta quraq və yarı quraq bölgələrdə necə məhsul almaq olar məsələlərindən gedir. İsrailin uzun illərdir çoxlu problemləri var, biz su qıtlığı, quru bölgələrlə üzləşmişik və biz kiçik dövlətik. Bu, bizi illərdir qarşılaşdığımız çətinlikləri aradan qaldırmaq üçün texnologiyalardan istifadə etməyə məcbur etdi. İndi, əlbəttə ki, biz su problemini həll etdik və sudan necə istifadə edəcəyimizi, İsraildə su sistemlərini necə idarə edəcəyimizi bilirik və suyun təkrar emalı sahəsində təcrübəmiz var. Bu məsələlər əslində ərzaq təhlükəsizliyinə təsir göstərir. Su olmadan meyvə yetişdirə bilməzsiniz, ancaq suyu israf etmədən düzgün istifadə etməklə meyvə yetişdirə bilərsiniz. Eyni zamanda, hesab edirəm ki, biz Azərbaycana sudan daha səmərəli istifadə etmək, suyun təkrar emalı və su təchizatı sistemini idarə etməkdə kömək edə bilərik. Dediyim kimi, bəzi İsrail şirkətləri artıq Azərbaycanda fəaliyyət göstərir, lakin daha çox şirkət cəlb olunmalı və onların aktiv fəaliyyəti təmin edilməlidir. Biz hər iki ölkə üçün beşillik strateji plan hazırlamalıyıq", - deyə nazir bildirib.
O.Forer qeyd edib ki, İsrail şirkətləri Qarabağda “ağıllı” kəndlərin tikintisi ilə də fəal məşğul olurlar.
"Qarabağa səfər etmək imkanım oldu və rayonun inkişaf prosesi məni heyran etdi. Bir il əvvəl orada heç nə yox idi, amma indi, bir ildən sonra kənd demək olar ki, hazırdır. Mən çox şadam ki, bu ərazilərdə kənd təsərrüfatında İsrail texnologiyalarından istifadə olunur. Düşünürəm ki, gələcək kənd təsərrüfatında yüksək texnologiyaların tətbiqindədir. İqlim dəyişikliyi və qlobal istiləşmə ilə bu texnologiyalar olmadan kənd təsərrüfatı ilə məşğul olmaq çox çətin olacaq. İnsanların kənd təsərrüfatı ilə məşğul olma tərzini dəyişmək üçün indi başlamalıyıq. Azərbaycanda elə bir region var ki, orada sıfırdan başlamaq və hər şeyi düzgün qurmaq olar. Çətinliklər var, lakin imkanlar sonsuzdur. Azərbaycan tərəfi suvarma, su təchizatı sistemləri sahəsində böyük biliyə malik olan İsrailin “Mekorot” şirkəti ilə müqavilə imzalayıb. Bu şirkət İsraildə bütün su təchizatı sistemini idarə edir. Biz bunu necə edəcəyimizi, bununla bağlı necə kömək edəcəyimizi bilirik. Hesab edirəm ki, bu sahədə böyük potensial var. Düşünürəm ki, tezliklə böyük investisiyalar hesabına burada yaxşı su təchizatı sistemi qura biləcəyik. Bu, Azərbaycan hökumətinin irəli sürdüyü baxışdır. İsrail öz biliklərini bölüşməyə hazırdır və əminəm ki, hər iki ölkə bundan faydalanacaq. Biz kənd təsərrüfatı sahəsində Azərbaycanın tərəfdaşı olacağıq və şirkətlərimiz dostlarımıza necə kömək etdiyimizi bütün dünyaya göstərə biləcəklər. Əminəm ki, Azərbaycanın bu əraziləri çiçəklənən regiona çevriləcək", - deyə nazir əlavə edib.