Sahibkarlığın İnkişafı Fondu sahibkarlığa dövlət dəstəyini gücləndirir
Bu gün muxtar respublikada həyata keçirilən sosial-iqtisadi inkişaf strategiyasının əsas məqsədi özəl sektorun inkişafı, biznes fəaliyyəti üçün əlverişli mühitin yaradılmasından ibarətdir. “Naxçıvan Muxtar Respublikasının 2019-2023-cü illərdə sosial-iqtisadi inkişafı Dövlət Proqramı”nda iqtisadiyyatın inkişafında sahibkarların rolunun artırılması zəruri istiqamətindən biri kimi qarşıya qoyulmuşdur. Naxçıvan Muxtar Respublikası İqtisadiyyat Nazirliyinin tabeliyində fəaliyyət göstərən Sahibkarlığın İnkişafı Fondunun vəsaitləri də sosial-iqtisadi inkişafın prioritet istiqamətləri üzrə investisiya layihələrinin maliyyələşdirilməsinə yönəldilir.
Sahibkarlığa dövlət dəstəyinin gücləndirilməsi və bu fəaliyyətin genişləndirilməsinin təmin edilməsi məqsədilə Naxçıvan Muxtar Respublikası Ali Məclisi Sədrinin "Naxçıvan Muxtar Respublikasında sahibkarlığın inkişafına dövlət dəstəyi mexanizminin təkmilləşdirilməsi haqqında" 2018-ci il 7 avqust tarixli Fərmanı ilə Sahibkarlığa Kömək Fondu ləğv edilərək İqtisadiyyat Nazirliyinin tabeliyində Sahibkarlığın İnkişafı Fondunun yaradılması və "Naxçıvan Muxtar Respublikası Sahibkarlığın İnkişafı Fondunun vəsaitindən istifadə Qaydası"nın təsdiqi bu maliyyə qurumunun inkişafında dönüş nöqtəsi olmuşdur.
Bu qaydaların tətbiqi sahibkarlara güzəştli kreditlərin verilməsində olduqca əhəmiyyətli rol oynamışdır. Eyni zamanda dövlət-sahibkar münasibətlərinin və özəl sektorun inkişafı, özəl sektorda təşviq alətlərinin tətbiqi, aqrar sektora, kiçik və orta sahibkarlığa dövlət dəstəyi daim diqqətdə saxlanılmışdır.
Sahibkarlıq subyektlərinin fəaliyyətinin stimullaşdırılması və genişləndirilməsi məqsədilə kreditlərin verilməsi 2022-ci ilin 5 ayı ərzində də davam etdirilmiş, iqtisadiyyatın müxtəlif sahələrinə Fond tərəfindən 5 milyon 899 min 300 manat kredit ayrılmışdır.
2022-ci ilin “Sənaye ili” elan olunması bu sahədə işləri daha da sürətləndirmiş, cari ilin ilk 5 ayı ərzində Sahibkarlığın İnkişafı Fondu tərəfindən polietilen məmulatlarının, salfet, araq, çaxır, mebel, plastik qapı-pəncərə, çörək, dondurma, kənd təsərrüfatı avadanlıqları və digər istehsal sahələri olmaqla, ümumilikdə 13 layihəyə 4 milyon 812 min manat kredit verilmişdir.
Şərur Sənaye Məhəlləsinin yaradılması muxtar respublikada sənayeləşmə siyasətinin əsas prioritetlərindəndir. Məhəllədə yeni isehsal sahələrinin yaradılmasında sahibkarlığın inkişafına göstərilən dövlət dəstəyinin də mühüm rolu olmuş, Sahibkarlığın İnkişafı Fondu tərəfindən 2 layihənin maliyyələşdirilməsinə 526 min 500 manat dövlət maliyyə dəstəyi göstərilmişdir.
Naxçıvan şəhərində “Naxçıvan Saray” Məhdud Məsuliyyətli Cəmiyyətinin, Ordubad rayonunun Anaqut kəndində “Xan Çinar” istirahət mərkəzinin istifadəyə verilməsi muxtar respublikada xidmət sahibkarlığının inkişaf etdirilməsinə və əhalinin daha rahat yaşayışının təmin olunmasına göstərilən qаyğının bariz nümunəsidir. Cari ilin 5 ayı ərzində turizm infrastrukturunun inkişafı və yeni xidmət sahələrinin yaradılması məqsədilə 4 layihənin maliyyələşdirilməsinə Sahibkarlığın İnkişafı Fondu tərəfindən 230 min manat dövlət maliyyə dəstəyi göstərilmişdir.
Əlavə iqtisadi artım mənbələrinin yaradılmasında və ixracın genişləndirilməsində stimullaşdırıcı tədbirlərdən olan güzəştli kreditləşdirmə kənd təsərrüfatı sahəsini də əhatə etmişdir. Sahibkarlığın İnkişafı Fondu tərəfindən cari ilin ötən dövrü ərzində heyvandarlıq, arıçılıq, quşçuluq, bağçılıq təsərrüfatları, soyuducu anbar olmaqla, ümumilikdə 46 layihəyə 857 min 300 manat güzəştli kredit verilmişdir. Bu layihələrin icrası ixracda kənd təsərrüfatı məhsullarının həcminin artmasına müsbət təsir göstərəcəkdir.
Kiçik sahibkarlığın baza potensialı hesab olunan ailə təsərrüfatlarının inkişaf etdirilməsi artıq muxtar respublikada həyata keçirilən ən mühüm iqtisadi tədbirlərdəndir. Bu məqsədlə kənd təsərrüfatının müxtəlif sahələri üzrə fəaliyyət göstərən 36 ailə təsərrüfatına Sahibkarlığın İnkişafı Fondu tərəfindən cari ilin 5 ayı ərzində 576 min 300 manat dövlət maliyyə dəstəyi göstərilmişdir. Fəaliyyətlərinin genişləndirilməsi məqsədilə həmin ailə təsərrüfatlarında aparılan maarifləndirmə tədbirləri zamanı Sahibkarlığın İnkişafı Fondunun vəsaitlərindən istifadə qaydaları və prioritet layihələr haqqında geniş məlumatlar verilmişdir.
Bəhs olunan dövrdə kreditlərin verilməsi müvəkkil kredit təşkilatları tərəfindən icra edilmiş, fond tərəfindən alınan vəsaitlərin aidiyyəti üzrə xərclənməsinə xüsusi diqqət yetirilmişdir.
Çinarə Balayeva
Naxçıvan Muxtar Respublikası
İqtisadiyyat Nazirliyinin
mətbuat və ictimaiyyətlə əlaqələr üzrə
baş məsləhətçisi