Çin gələn aydan Azərbaycana birbaşa uçuşları bərpa edəcək
Çinin Quançjou şəhəri (Urumçi vasitəsilə) ilə Bakı arasında gediş-gəliş mart ayında rəsmi olaraq bərpa olunacaq.
Çinin Azərbaycandakı səfirliyindən NUHÇIXAN İnformasiya Agentliyinə bildirilib ki, “China Southern Airlines” şirkətinin yaydığı məlumata görə, martın 13 və 20-də hər iki tərəfə yalnız bir reys həyata keçiriləcək. Martın 26-dan etibarən isə həftədə iki reysin (Çərşənbə/Bazar) bərpası planlaşdırılır.
Səfirlik qeyd edib ki, son üç ildə koronavirus (COVID-19) epidemiyasının təsiri ilə əlaqədar Çin və Azərbaycan arasında uçuşlar azaldılıb, müntəzəm birbaşa uçuşlar isə müvəqqəti olaraq dayandırılmışdı. 2023-cü ilin əvvəlində Çin yeni növ koronavirus epidemiyasının qarşısının alınmasında və ona qarşı mübarizədə böyük və qətiyyətli qələbə qazandığından, xarici əməkdaşlığı həyata keçirmək və əlaqələri bərpa etmək, Azərbaycan da daxil olmaqla müxtəlif ölkələrin səlahiyyətli mülki aviasiya orqanları ilə fəal əlaqə saxlamaq və Çin ilə digər ölkələr arasında birbaşa uçuşların sürətlə bərpasına kömək üçün əlindən gələni edir.
Bildirilib ki, Çin Azərbaycanla əlaqələrin inkişafına böyük əhəmiyyət verir. Birbaşa uçuşların epidemiyadan əvvəlki səviyyələrə qaytarılması Çinin iki tərəf arasında kadr mübadiləsinin daha da asanlaşdırılmasına və müxtəlif sahələrdə əməkdaşlığın dərinləşdirilməsinə müsbət münasibətini tam nümayiş etdirir. Çin Azərbaycanın müxtəlif sahələrdə fəaliyyət göstərən qurumlarını, müəssisələrini və ayrı-ayrı şəxslərin Çinə səfər etmələrini, bu ölkədə təhsil almalarını, sərgilərə qatılmalarını və işgüzar danışıqlar aparmalarını səmimiyyətlə qarşılayır.
“Çin Azərbaycanla "Kəmər və Yol Təşəbbüsü" tikintisinin ikinci onilliyinin daha yüksək səviyyəyə keçməsi üçün iki ölkə və onların xalqları arasında dostluq və qarşılıqlı faydalı münasibətləri gücləndirmək üçün əməkdaşlıq etməyə hazırdır”, - deyə səfirliyin məlumatında vurğulanıb.