WhatsApp çoxdan gözlənilən funksiyanı tətbiq edib

Androiddə WhatsAppın son beta versiyalarında bir akkauntun eyni zamanda bir neçə smartfondan istifadə edilməsi imkanı yaranıb.

NUHÇIXAN İnformasiya Agentliyi xəbər verir ki, bundan əvvəl oxşar funksiya yalnız Android idarə olunması ilə smartfon və planşetin bağlantısı üçün mövcud olub.

Belə ki, Android üçün WhatsAppın 2.23.8.2 saylı və daha yüksək beta versiyalarını endirərək, istifadəçi əsas akkaunta ikinci smartfonundan giriş edə bilər. Bunun üçün ikinci cihazda nömrənin qeydiyyatı səhifəsində ekranın sağ yuxarı küncündə üç nöqtəyə basmaq və “Mövcud akkauntla əlaqələndirmək” bəndini seçmək lazımdır. Daha sonra əsas smartfonu götürüb WhatsAppın əsas səhifəsində üç nöqtəyə basaraq “Əlaqələndirilmiş cihazlar” bölməsini seçmək, ardından ikinci smartfonda görünən QR-kodu skanlaşdırmaq lazımdır.

Beləliklə, istifadəçilər Android idarə olunması ilə mövcud akkauntlarına eyni zamanda bir neçə cihazlardan, o cümlədən PK, planşet və ikinci smartfondan giriş edə bilərlər.

Bu yenilik hələ ki, yalnız Androiddə WhatsAppın beta-versiyasında tətbiq olunub. Sabit quraşdırılmada və Apple cihazlarında yeni funksiyanın peyda olunması barədə hələ ki, məlumat verilmir.