Naxçıvanın ötən ilin yekunlarına dair iqtisadi inkişaf göstəriciləri açıqlanıb - FOTOLAR
2023-cü ildə Naxçıvan Muxtar Respublikasında 1 milyard 552 milyon manat dəyərində ümumi məhsul istehsal olunub.
NUHÇIXAN xəbər verir ki, bunu yerli iqtisadiyyat nazirinin müavini, nazir vəzifəsini müvəqqəti icra edən Abbas İsmayılov bildirib.
Onun sözlərinə görə, ötən il bölgədə 593,9 milyon manatlıq sənaye məhsulu, 358,4 milyon manatlıq kənd təsərrüfatı məhsulu istehsal olunub, əhaliyə 34,2 milyon manatlıq informasiya və rabitə xidmətləri, 178,2 milyon manatlıq ödənişli xidmətlər göstərilib.
Nazir əvəzi qeyd edib ki, Naxçıvan iqtisadiyyatında şəffaflığın artması, “kölgə iqtisadiyyatı”nın miqyasının azaldılması, biznes fəaliyyətinin leqallaşdırılması vergi daxilolmalarının dinamik artımı ilə nəticələnib: "2023-cü ildə qeyri-dövlət sektorunun büdcə gəlirlərində payı 55,7 %, vergi daxilolmalarında payı isə 62,4 % təşkil edib. Sahibkarlığın sürətli inkişafında önəmli amillərdən biri maliyyə əlçatanlığıdır. Ötən il Sahibkarlığın İnkişafı Fondu 40 investisiya layihəsinə 6,2 milyon manat güzəştli kredit verib. Bunun 84,8 %-i sənaye, 11,7 %-i kənd təsərrüfatı, 3,5 %-i isə xidmət sektoruna yönəldilib. 2023-cü ildə muxtar respublikanın iqtisadiyyatında kiçik və orta biznesin (KOB) dominantlığı xeyli yüksəlib, qeydiyyatda olan KOB subyektlərinin sayı 26 % artıb. İl ərzində burada aylıq əməkhaqqı isə 689 manat təşkil edib".
"Daşınmaz əmlakın şəffaf idarə edilməsi nəticəsində ötən il bağlanmış icarə müqavilələrindən büdcəyə daxilolmalar 7,7 %, daşınmaz əmlak obyekti üzərində hüquqların dövlət qeydiyyatı 43,6 %, dövlət əmlakının özəlləşdirilməsindən və icarəsindən daxilolmalar ötən illə müqayisədə 2,2 dəfə artıb.
Muxtar respublikada sahibkarların dövlət satınalmalarında aktiv iştirakı ilə rəqabətlilik təmin edilib. 2023-cü ildə 531-dən çox müsabiqə əsaslı satınalma həyata keçirilib, satınalmalarda ehtimal olunan qiymətin 16 %-nə qənaət olunub", - deyə A.İsmayılov əlavə edib.
“Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” barədə danışan nazir müavini bildirib ki, proqramın əsas qayələrindən biri də sahibkarlar üçün əlverişli investisiya mühiti formalaşdırmaq, azad iqtisadi zona yaradıb Naxçıvanı əsas sərmayə mərkəzi etməkdir.
"Xarici və yerli investorların Naxçıvana səfəri muxtar respublikanın iqtisadi potensialı, investisiya imkanları ilə yaxından tanış olmaları, sözsüz ki, yeni investisiyaların yatırılması baxımından təkan rolunu oynayacaq", - deyə A.İsmayılov fikrini tamamlayıb.