Naxçıvanda Milli Musiqi Günü qeyd olunub - FOTOLAR
Naxçıvan Muxtar Respublikası Mədəniyyət Nazirliyinin təşkilatçılığı ilə Heydər Əliyev Sarayında Naxçıvan Muxtar Respublikasının 100 illiyi çərçivəsində Milli Musiqi Gününə həsr olunmuş tədbir keçirilib.
NUHÇIXAN xəbər verir ki, mədəniyyət, incəsənət nümayəndələrinin, ali, orta ixtisas məktəblərinin müəllim və tələbələrinin, yaradıcı birliklərin və ictimaiyyət nümayəndələrinin iştirak etdiyi tədbirdə çıxış edən muxtar respublikanın mədəniyyət nazirinin müavini Həsən Seyidov dünyaşöhrətli bəstəkar, ictimai xadim Üzeyir Hacıbəylinin həyat və yaradıcılığından, Azərbaycan mədəniyyəti qarşısında misilsiz xidmətlərindən bəhs edib, Ulu Öndər Heydər Əliyevin Fərmanına əsasən, görkəmli bəstəkarın ad günündə Milli Musiqi Gününün qeyd olunduğunu diqqətə çatdırıb.
H.Seyidov qeyd edib ki, Üzeyir Hacıbəyli 1908-ci ildə yazdığı “Leyli və Məcnun” əsəri ilə təkcə Azərbaycanda deyil, bütün müsəlman Şərqində opera sənətinin əsasını qoyub. Bir-birinin ardınca yazdığı opera və operettaları, marşları, kantataları, mahnı və romansları, kamera və xor üçün əsərləri ilə musiqi xəzinəmizi zənginləşdirib. Ulu Öndər Heydər Əliyevin hər zaman Üzeyir Hacıbəylinin şəxsiyyətini yüksək qiymətləndirdiyini deyən nazir müavini diqqətə çatdırıb ki, Şanlı Zəfərdən sonra dövlət başçısı İlham Əliyevin və Birinci vitse-prezident Mehriban xanım Əliyevanın iştirakı ilə Şuşada dahi bəstəkarın heykəli yenidən ucaldılıb, əsərləri illər sonra doğma yurdunda səslənib.
Bildirilib ki, Ulu Öndərin bütün sahələrdə uğurlu davamçısı olan Prezident İlham Əliyevin həssas münasibəti sayəsində Üzeyir Hacıbəyli irsi bu gün də hörmətlə yaşadılır və təbliğ olunur. Nazir müavini əlamətdar gün münasibəti ilə mədəniyət, incəsənət nümayəndələrini təbrik edib, onlara yeni sənət uğurları arzulayıb.
Sonra Naxçıvan Dövlət Filarmoniyasının Xalq Çalğı Alətləri Orkestrinin Milli Musiqi Gününə həsr olunmuş konsert proqramı təqdim edilib. Fikrət Əmirovun "Azərbaycan kapriççiosu” musiqisi ilə başlayan konsertdə dahi bəstəkar Üzeyir Hacıbəylinin əsərlərindən parçalar, həmçinin görkəmli bəstəkarlardan Emin Sabitoğlunun, Süleyman Ələsgərovun, Cahangir Cahangirovun, Ramiz Mirişlinin əsərləri ifa edilib. Naxçıvan Dövlət Filarmoniyasının Xalq Çalğı Alətləri Orkestrinin bədii rəhbəri Hakim Məmmədlinin dirijor olduğu musiqi şölənində əsərlər Naxçıvan Muxtar Respublikasının Əməkdar artisti Zülfüqar Mahmudov, Prezident mükafatçıları Nərmin Hüseynova, İlkin Abdullayev və İsrafil Qibləliyev tərəfindən təqdim olunub.
Konsert Naxçıvan Muxtar Respublikasının Əməkdar artisti Ruhiyyə Hüseynovanın ifasında "Zəfər himni” ilə sona çatıb.