Ədəbiyyat Muzeyində poeziya axşamı təşkil olunub - FOTOLAR
NUHÇIXAN xəbər verir ki, Ədəbiyyat Muzeyində Naxçıvan Muxtar Respublikasının 95 illik yubileyinə həsr olunmuş poeziya axşamı keçirilib.
Tədbirdə Naxçıvan Muxtar Respublikası Yazıçılar Birliyinin sədri Asim Əliyev bildirib ki,95 illik tarixindəədəbiyyatımız da bir çox uğurlara imza atıb. XX əsrdə ədəbiyyatımıza Cəlil Məmmədquluzadə, Hüseyn Cavid, Məmməd Səid Ordubadi kimi nəhəng simalar bəxş edən Naxçıvan ədəbi mühitinin Məmməd Araz, İslam Səfərli, Hüseyn İbrahimov, Müzəffər Nəsirli, Adil Babayev kimi görkəmli qələm sahibləri də öz yaradıcılıq dəst-xətləri ilə seçilib, Azərbaycan ədəbiyyatının inkişafına mühüm töhfə veriblər.
Qeyd olunub ki, Sovetlər Birliyi dönəmində Naxçıvan Yazıçılar Birliyinin cəmi 11-12 üzvü olduğu halda, indi Birlik üzvlərinin sayı 70-ə çatıb. Birliyin indiyə kimi 30-a yaxın almanaxı dərc olunub ki, onların da 15-i son 12 ildə işıq üzü görüb. Vurğulanıb ki, son illərdə yazılan şeir və poemalar, nəsr əsərləri onu göstərir ki, Naxçıvanın müasir inkişafı və qədim tarixi, həyata keçirilən böyük abadlıq və quruculuq işləri, eləcə də qədim diyarımızın gözəlliyi şair və yazıçılarımızın əsərlərində böyük sevgi ilə tərənnüm olunur.
Naxçıvan Muxtar Respublikası Yazıçılar Birliyinin üzvləri Əbülfəz Ülvi, Zeyqəm Vüqar, Tofiq Qəbul və Elxan Yurdoğlu Naxçıvanla bağlı yazdıqları şeirlərinisəsləndiriblər.
Sonda Naxçıvan şəhər ümumtəhsil məktəblərinin şagirdləri Naxçıvana həsr olunmuş şeirləri bədii qiraət ediblər.
Mədinə Rəhimli