Naxçıvan Dövlət Milli Dram Teatrı Türkiyədə beynəlxalq festivalda çıxış edib - FOTOLAR

NUHÇIXAN xəbər verir ki, Naxçıvan Dövlət Milli Dram Teatrı Türkiyənin Trabzon vilayətinin Akçaabat bələdiyyəsi tərəfindən təşkil olunan VI Açıq Hava Teatr Günləri çərçivəsində uğurla çıxış edib. Festival 3–9 iyul tarixlərində Akçaabat Sahilpark Festival Meydanında keçirilir və müxtəlif şəhərlərdən teatr kollektivlərini bir araya gətirir.

Teatr kollektivi yazıçı Balaxan Nəzərlinin "Gəmi batır" əsəri əsasında, Əməkdar artist Səməd Canbaxşiyevin quruluşunda hazırlanan eyniadlı tamaşanı tamaşaçılara təqdim edib.

Tamaşada rolları Səməd Canbaxşiyev və Ləman Vəliyeva ifa ediblər. Səhnə tərtibatı və musiqi tərtibatı da Səməd Canbaxşiyevə məxsusdur.

Qara dəniz sahilində, açıq havada qurulan səhnədə nümayiş etdirilən tamaşa Akçaabat sakinləri və şəhərin qonaqları tərəfindən böyük maraqla qarşılanıb. İzləyicilər aktyorların peşəkar ifasını sürəkli alqışlarla qiymətləndirib, tamaşa festivalın yaddaqalan səhnə əsərlərindən biri kimi diqqət çəkib.

Naxçıvan Dövlət Milli Dram Teatrının beynəlxalq teatr festivalındakı uğurlu çıxışı Azərbaycan teatr sənətinin ölkə hüdudlarından kənarda tanıdılması və iki qardaş ölkə arasında mədəni əlaqələrin daha da möhkəmləndirilməsi baxımından əhəmiyyətli hadisə kimi qiymətləndirilir.