Qanun ifaçıları konsert veriblər - FOTOLAR

NUHÇIXAN xəbər verir ki, Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbinin qanun ixtisası üzrə müəllimi Sevinc Babayeva və  şagirdlərinin “Gənclik” Mərkəzində Naxçıvan Muxtar Respublikasının 95 illiyinə həsr olunan konserti olub.

İstedadlı qanun ifaçısı tamaşaçılar üçün Adil Gərayın “Baxça-Kürd”, Zakir Bağırovun “Rapsodiya”, Dadaş Dadaşovun “Skerso”, Səid Rüstəmovun “Qaytağı”, Azər Rzayevin “Cahargah rapsodiyası”nı ifa edib.

Şagirdlər isə Azərbaycan bəstəkarlarından Ü.Hacıbəyov, S.Ələsgərov, S.Rüstəmov, A.Gərayın, rus bəstəkarlarından P.Çaykovski, L.Dimitresku, M.Blanterin, gürcü bəstəkarı R.Laqidze və başqalarının musiqilərindən nümunələr səsləndiriblər. 

Konsertdən sonra iştirakçıları təbrik edən Naxçıvan Muxtar Respublikasının Mədəniyyət naziri Natəvan Qədimova muxtar respublikamızda mədəniyyət və incəsənətin bütün sahələrinə, o cümlədən musiqiyə böyük diqqət və qayğının göstərildiyini qeyd edib.

Əli Rzayev