Anadolu Agentliyində İbrahim Səfiyə həsr edilmiş kitab haqqında məqalə dərc olunub

Türkiyənin Anadolu Agentliyində tanınmış azərbaycanlı rəssam İbrahim Səfiyə həsr olunmuş “İbrahim Səfi - rəsmlər, məktublar, sənədlər” adlı kitab haqqında məqalə dərc olunub.

NUHÇIXAN xəbər verir ki, nəşr barədə agentliyə müsahibə verən kitabın ön sözünün müəllifi Azərbaycanın İstanbuldakı baş konsulu Məsim Hacıyev bu nəşrin iki qardaş ölkə - Türkiyə ilə Azərbaycan arasındakı əlaqələrin inkişafı baxımından çox gözəl nümunələrdən biri olduğunu qeyd edib: “İqtisadi və siyasi sahələrdə inkişaf edən əlaqələrimizin mədəniyyət sahəsində də irəliləməsi vacibdir. İbrahim Səfiyə həsr olunmuş bu kitabı da mədəni əlaqələrin inkişafının bir nümunəsi, kiçik bir hissəsi kimi görmək olar”.

Qeyd edək ki, İbrahim Səfiyə aid rəsm əsərləri, məktublar və sənədlərin yer aldığı kitab Azərbaycanın İstanbuldakı Baş konsulluğunun təşəbbüsü və Azərbaycan Respublikası Dövlət Neft Şirkətinin (SOCAR) Türkiyədəki nümayəndəliyinin dəstəyi ilə dərc olunub.