Əməkdar artistin 60 illik yubileyi qeyd olundu
NUHÇIXAN xəbər verir ki, Azərbaycan Respublikasının Əməkdar artisti Tofiq Seyidovun 60 illik yubileyi qeyd olunub.
Cəlil Məmmədquluzadə adına Naxçıvan Dövlət Musiqili Dram Teatrında bu münasibətlə keçirilən tədbirdə Naxçıvan Muxtar Respublikasının Mədəniyyət naziri Natəvan Qədimova yubilyarı təbrik edib, ona Naxçıvan Muxtar Respublikası Ali Məclisinin Sədri adından hədiyyə təqdim edib.
Tədbirdə aktyorun sənət dostları Naxçıvan Dövlət Musiqili Dram Teatrının direktoru, Xalq artisti Rza Xudiyev, Xalq artisti Kamran Quliyev, Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva və digərləri çıxış edərək 60 illik yubileyi münasibətilə onu təbrik ediblər.
Sonda Tofiq Seyidov yaradıcılığına yüksək qiymət verildiyi üçün Naxçıvan Muxtar Respublikası Ali Məclisinin Sədrinə dərin minnətdarlığını bildirib, səhnə sənətimizin inkişafı üçün bundan sonra da yorulmadan çalışacağını deyib.
Mədinə Rəhimli