Xalq artisti Çingiz Axundovun 60 illik yubileyi qeyd olunub - FOTOLAR

NUHÇIXAN xəbər verir ki, Xalq artisti Çingiz Axundovun 60 illik yubileyi münasibətlə Naxçıvan Dövlət Filarmoniyasında tədbir keçirilib.

Tədbirdə  Naxçıvan Muxtar Respublikasının Mədəniyyət naziri Natəvan Qədimova xalq artistinin  keçdiyi həyat yolundan və fəaliyyətindən söhbət açıb. Vurğulanıb ki, Çingiz Axundovun əməyi dövlətimiz tərəfindən yüksək qiymətləndirilib. O, 2006-cı ildə Naxçıvan Muxtar Respublikasının, 2007-ci ildə “Azərbaycan Respublikasının Əməkdar artisti”, 2009-cu ildə isə “Azərbaycan Respublikasının Xalq artisti” fəxri adlarına layiq görülüb.

Sonra Natəvan Qədimova yubilyarı təbrik edib, ona Naxçıvan Muxtar Respublikası Ali Məclisinin  Sədri adından  hədiyyə təqdim edib.

Tədbirdə dirijorun sənət dostları çıxış edərək yubilyara ürək sözlərini bildirib, onu 60 illik yubileyi münasibətilə təbrik ediblər.

Xalq artisti Çingiz Axundov yaradıcılığına yüksək qiymət verildiyi üçün Naxçıvan Muxtar Respublikası Ali Məclisinin Sədrinə dərin  minnətdarlığını bildirib, musiqi sənətimizin inkişafı üçün bundan sonra da fədakarlıqla çalışacağını deyib.

Sonda konsert proqramı təşkil olunub

                                                            Mədinə Rəhimli