Böyük Britaniyada nəşr olunan turizm broşüründə Naxçıvan barədə geniş məlumat verilib

Naxçıvan Muxtar Respublikasının turizm potensialı, zəngin tarixi-mədəni irsi, müasir inkişafı haqqında məlumatların yayılması və təbliği məqsədilə Böyük Britaniyada fəaliyyət göstərən nüfuzlu “Regent Holidays” turizm şirkətinin 2020-ci il üçün hazırladığı yeni turizm broşuruna Naxçıvan Muxtar Respublikasına turlar da daxil edilib. NUHÇIXAN xəbər verir ki, “Regent Holidays” turizm şirkəti tərəfindən nəşr olunan broşur Böyük Britaniyada fəaliyyət göstərən biznes mərkəzləri, turizm sərgiləri, qəzet köşkləri, alış-veriş mərkəzləri, restoranlar və turistlərin daha çox olduğu ərazilərə paylanır.

Broşurda Naxçıvan Muxtar Respublikasına 2020-ci ilin may ayında təklif olunan 3 günlük tur proqramından xüsusi bəhs olunub və Naxçıvan barədə aşağıdakı qeydlər yer alıb: “Adi turistik ərazilərdən fərqli olaraq kiçik qrup turu ilə Azərbaycanın zəngin tarixi və mədəniyyətini tədqiq edin. Neftlə məşhur şəhəri və tarixi qalaları olan fərqli bir ölkəni kəşf edin. Tur proqramında diqqəti çəkən ən maraqlı məqam Naxçıvan Muxtar Respublikasında üç gün qalmaqdır. Azərbaycanın ayrılmaz parçası olan bu diyara turist səfərləri təşkil olunur. Biz də turistləri bu qədim diyarla tanış etmək məqsədilə turlar təşkil etmişik. Əminik ki, turistlər Naxçıvan turundan məmnun qalacaqlar”.