Gənc ifaçılar arasında vokal və xanəndəlik üzrə muxtar respublika müsabiqəsi keçirilib - FOTOLAR
NUHÇIXAN İnformasiya Agentliyi xəbər verir ki, müsabiqədə Naxçıvan Musiqi Kollecinin, uşaq musiqi, incəsənət və bədii sənətkarlıq məktəblərinin və Naxçıvan Dövlət Uşaq Filarmoniyasının üzvləri iştirak edib.
Bu münasibətlə keçirilən tədbirdə Naxçıvan Muxtar Respublikası Mədəniyyət Nazirliyi Aparatının rəhbəri Piri Nağıyev bildirib ki, muxtar respublikada belə istedadlı yeniyetmə və gənclərin yaradıcılıq potensialının üzə çıxarılması, inkişaf etdirilməsi, onların müsabiqə və festivallarda fəal iştiraklarının təmin edilməsi istiqamətində məqsədyönlü işlər görülür, müxtəlif müsabiqələr keçirilir. Bu gün təşkil edilən vokal və xanəndəlik üzrə muxtar respublika müsabiqəsi də onlardan biridir. Məqsəd gənc istedadların aşkara çıxarılması, onların ifaçılıq bacarıqlarının stimullaşdırılmasıdır.
Çıxışlardan sonra start verilən müsabiqə 8-13 və 14-18 olmaqla, 2 yaş qrupu üzrə keçirilib. 25 nəfər iştirakçının ifasında Azərbaycan və dünya klassiklərinin əsərləri təqdim edilib.
Qeyd edək ki, muxtar respublikanın tanınmış incəsənət xadimlərindən ibarət münsiflər heyəti tərəfindən gizli səsvermə yolu ilə seçilən qaliblər yekun tədbirində mükafatlandırılacaq.
Mədinə Rəhimli