“Nizami dünyası” teatr müsabiqəsi başa çatıb - FOTOLAR

Ölkəmizdə elan olunan “Nizami Gəncəvi ili” çərçivəsində Ali və orta ixtisas təhsili müəssisələrinin teatr studiyaları arasında keçirilən “Nizami dünyası”  teatr müsabiqəsinin qalibləri müəyyənləşib.

NUHÇIXAN İnformasiya Agentliyi xəbər verir ki, bu münasibətlə Naxçıvan Dövlət Uşaq Teatrında  keçirilən tədbirdə qeyd olunub ki, müsabiqə Naxçıvanda teatr sənətinin inkişafına dəyərli töhfə kimi  istedadlı gənclərin zövqünün formalaşmasına təsir edib, onların professional teatr sənətinə marağını artırıb.

Çıxışların ardından qaliblər mükafatlandırılıb. Yekun qiymətləndirməyə əsasən Naxçıvan Dövlət Universitetinin komandası müsabiqənin qalibi adına layiq görülüb. Naxçıvan Musiqi Kolleci və Naxçıvan Müəllimlər İnstitutunun teatr studiyaları müvafiq olaraq ikinci, üçüncü sıralarda qərarlaşıblar. “Naxçıvan” Universiteti və Naxçıvan Dövlət Texniki Kollecinin təmsilçiləri fəal iştiraka görə təltif ediliblər. Qalib və fərqlənən komandalara diplom, plaket və hədiyyələr təqdim olunub.

Sonra müsabiqədə birinci yerin qalibi olan Naxçıvan Dövlət Universitetinin Tələbə teatr studiyasının hazırladığı “Xeyir və Şər” tamaşası nümayiş olunub.

Xosrov İbrahimov