Rəssam Səkinə Qarayevanın fərdi sərgisi açılıb - FOTOLAR

NUHÇIXAN İnformasiya Agentliyi xəbər verir ki, “Yaradıcılıq yolu” adı altında Rəssamlar Birliyinin Bəhruz Kəngərli adına Sərgi Salonunda açılan sərgidə rəssamın 100-ə yaxın əsəri nümayiş etdirilir.

Sərgidə Naxçıvan Muxtar Respublikası Rəssamlar Birliyinin sədri, Əməkdar rəssam Ülviyyə Həmzəyeva bildirib ki, rəssam ömrünün 30 ildən çoxunu bu sənətin inkişafına həsr edib. O, müxtəlif janrlarda və mövzularda orijinal, dəyərli sənət əsərləri yaradıb. İstedadlı rəssamın müxtəlif dövrlərdə muxtar respublikada və paytaxt Bakı şəhərində sərgiləri təşkil olunub. Hazırda Heydər Əliyev Uşaq-Gənclər Yaradıcılıq Mərkəzində çalışan rəssam həm də  istedadlı ardıcıllar hazırlayır.

Əsərlərdəki milli ruh və milli kolorit rəssamın dərin yurd, Vətən sevgisini təcəssüm etdirir. Portret, mənzərə, natürmort, kompozisiyalar rəssamın peşəkarlığından və zəngin yaradıcılıq dünyasından xəbər verir. Sərgidəki əl işləri sırasında yüzlərlə daşlardan və tullantı matriallarından  hazırlanan əl işləri sərgi iştirakçıları tərəfindən maraqla izlənilib.

Sərgi 1 həftə davam edəcək.

Mədinə Rəhimli