Gənc rəssam Özcan Babayevin fərdi sərgisi açılıb - FOTOLAR
NUHÇIXAN İnformasiya Agentliyi xəbər verir ki, bu gün Naxçıvan Muxtar Respublikası Rəssamlar Birliyinin Bəhruz Kəngərli adına sərgi salonunda gənc rəssam Özcan Babayevin fərdi sərgisi keçirilib.
Naxçıvan Muxtar Respublikası Rəssamlar Birliyi və Gənclər Fondunun birgə təşkilatçılığı ilə açılan sərgidə əvvəlcə Azərbaycanın ərazi bütövlüyü uğrunda şəhid olan qəhrəmanlarımızın əziz xatirəsi bir dəqiqəlik sükutla yad edilib.
Naxçıvan Muxtar Respublikası Rəssamlar Birliyinin sədri, əməkdar rəssam Ülviyyə Həmzəyeva, Naxçıvan Muxtar Respublikası Gənclər Fondunun icraçı direktoru Cəbi Quliyev tədbir iştirakçılarını Gənclər Günü münasibətilə təbrik ediblər. Bildirilib ki, bu gün istedadlı gənclərimizin sırasında rəssamlığa maraq göstərənlər də kifayət qədərdir. Gənc rəssamlar istedad və bacarıqlarını inkişaf etdirir, Naxçıvan rəssamlıq sənətinə öz töhfələrini verirlər. İstedadı ilə seçilən gənc rəssamlarımızdan biri də bu gün fərdi sərgisi açılan Özcan Babayevdir. Onun yaradıcılığı çoxşaxəli və ümidvericidir. Sevindirici haldır ki, gənc rəssamlarımız şanlı Qarabağ Zəfərimizə, torpaqlarımızın ərazi bütövlüyünü bərpa edən, xalqımızı otuz illik həsrətdən sonra tarixi torpaqlarına qovuşduran qəhrəman şəhidlərimizin və qazilərimizin portretlərinə daha çox yer verirlər.
Tədbirdə digər çıxış edənlər də gənclərə yaradılan şəraitdən danışıb, gənc rəssama yaradıcılıq uğurları arzulayıblar. Sonra gənc rəssam Özcan Babayevə Gənclər Fondunun plaketi təqdim edilib.
Gənc rəssam Özcan Babayev fərdi sərgisinin təşkilinə görə minnətdarlığını bildirib.
Sərgidə rəssamın sulu boya ilə işlədiyi 52 əsəri nümayiş olunur. Müxtəlif mövzulara həsr edilən bu əsərlərdə Naxçıvan təbiəti və portretlər üstünlük təşkil edir. Zəngin rəng koloriti ilə diqqəti cəlb edən əsərləri Özcan Babayevin geniş yaradıcı təxəyyülünün məhsulu kimi diqqəti cəlb edir.
Adilə Səfərova