Rəssamlar Birliyinin internet saytı yenilənib - FOTOLAR
NUHÇIXAN İnformasiya Agentliyi xəbər verir ki, Naxçıvan Muxtar Respublikası Rəssamlar Birliyinin rəsmi internet saytı (nrb.nakhchivan.az) yenilənib.
Bu münasibətlə keçirilən tədbirdə Naxçıvan Muxtar Respublikası Rəssamlar Birliyinin sədri, əməkdar rəssam Ülviyyə Həmzəyeva qeyd edib ki, birliyin saytı 2011-ci ildə yaradılıb. Ali Məclis Sədrinin 25 may 2019-cu il tarixli Sərəncamına əsasən Naxçıvan Muxtar Respublikasının 95 illik yubileyi ilə əlaqədar Rəssamlar Birliyinin fəaliyyətinin müasir tələblər səviyyəsində qurulması, Naxçıvan rəssamlıq sənətinin inkişafına dəstək olan rəsm festivallarının təşkili və festivala həsr olunmuş albom- kataloqların hazırlanması ilə yanaşı, internet saytı da hazırlanıb.
Bu il isə sayt yenilənib, rahat istifadə, geniş vizual imkanlar və daha dolğun məlumat bazası yaradılıb. İngilis dilində də fəaliyyət göstərməsi nəzərdə tutulan sayt istifadəçi rahatlığı nəzərə alınaraq funksionallıq və məzmun cəhətdən təkmilləşdirilib, yeni informasiyalarla zənginləşdirilib. Burada incəsənətin təbliği yolunda böyük önəm daşıyan təsviri-dekorativ rəsm nümunələri yerləşdirilib. Saytda Rəssamlar Birliyi tərəfindən görülən işlər xronoloji ardıcıllıqla əks etdirilib. Ülviyyə Həmzəyeva saytı həmçinin Rəssamlar Birliyinin arxivi kimi dəyərləndirib.
Saytda Rəssamlar Birliyi tərəfindən keçirilən tədbirlər, təşkil olunan festival və sərgilər, eləcə də rəssamlar haqqında məlumatlar öz əksini tapır. Diqqətə çatdırılıb ki, “Rəsm qalereyası” adlı bölmədə rəngkarlıq və qrafika üslubunda çəkilmiş əsərlər, dekorativ tətbiqi sənət nümunələrinin onlayn satışının də həyata keçirilməsi nəzərdə tutulub. Sayt nrb.nakhchivan.az domen adı ilə fəaliyyət göstərir.
Mədinə Rəhimli