“İnstrumental pyeslər, simli və nəfəsli alətlər üçün” dərs vəsaitinin təqdimatı keçirilib - FOTOLAR
NUHÇIXAN İnformasiya Agentliyi xəbər verir ki, Naxçıvan Muxtar Respublikası Bəstəkarlar Təşkilatında Naxçıvan Dövlət Universiteti İncəsənət fakültəsi Fortepiano kafedrasının baş müəllimi Fəridə Ağayevanın “İnstrumental pyeslər, simli və nəfəsli alətlər üçün” dərs vəsaitinin təqdimatı keçirilib.
Tədbirdə Naxçıvan Muxtar Respublikası Bəstəkarlar Təşkilatının sədri, əməkdar incəsənət xadimi Yaşar Xəlilov çıxış edərək bildirib ki, təşkilatın üzvü Fəridə Ağayevanın sayca üçüncü kitabı olan yeni dərs vəsaiti gənc musiqiçilərin yetişməsində mühüm rol oynayacaq.
Yaşar Xəlilov bəstəkarı təbrik edib, yaradıcılıq uğurları arzulayıb.
Tədbirin bədii hissəsində müəllifin müxtəlif janrlarda bəstələdiyi “Doğma musiqim”, “Payız”, “Gəl barış” və “Şuşa həsrəti” əsərləri ifa olunub.
Çıxış edənlər bəstəkara xoş arzularını çatdırıb, sənət uğurları arzulayıblar.
Tədbirin sonunda müəllif göstərilən diqqətə görə minnətdarlığını bildirib, bundan sonra da yaradıcılıq axtarışlarında olacağını vurğulayıb.
Adilə Səfərova