Şahbuz Mədəniyyət Sarayında Novruz şənliyi keçirilib - FOTOLAR

Muxtar respublikada bayram günlərində Novruz şənlikləri davam etdirilir. NUHÇIXAN İnformasiya Agentliyi xəbər verir ki, Şahbuz Şəhər Mədəniyyət Sarayında rayonun Mədəniyyət və Təhsil şöbələrinin birgə təşkilatçılığı ilə “Bahar gəlir, xoş gəlir” adlı bayram şənliyi keçirilib.

Tədbirin aparıcıları ümummilli lider Heydər Əliyevin bu bayram haqqında vurğuladığı “Novruz hər bir azərbaycanlının qəlbinin bayramıdır. Hər bir insanın, ailənin bayramıdır... Novruz dostluq, mehribanlıq, mərhəmət, mədəniyyət bayramıdır, xalqımızın qəhrəmanlığını, rəşadətini, şücaətini nümayiş etdirən bayramdır”, - fikirlərini səsləndirərək tədbir iştirakçılarını bayram münasibətilə təbrik ediblər.

Mədəniyyət Sarayında keçirilən tədbirdə el ağsaqqalı Dədə Qorqudun gəlişi və Bahar qızının çıxışı tədbirə rəng qatıb.

Tədbirdə yüz illərdən bəri formalaşan Novruz ənənəsini əks etdirən səhnələr, yallı nümunələri nümayiş etdirilib, məktəblilər tərəfindən milli musiqilər ifa edilib, aşıq havaları iştirakçılara xoş ovqat bəxş edib.

Aygün Hüseynova