Xan qızı Natəvanın yubileyinə dəyərli töhfə - FOTOLAR
Tarixi ənənələrə malik Naxçıvan teatrı daim yeni və baxımlı tamaşalarla teatrsevərlərin qarşısına çıxır.
NUHÇIXAN İnformasiya Agentliyi xəbər verir ki, mövsümü Nikolay Vasilyeviç Qoqolun “Müfəttiş” əsəri əsasında hazırlanmış eyniadlı tamaşa ilə açan teatrın kollektivi hazırda yazıçı-dramaturq İlyas Əfəndiyevin eyniadlı əsərinin motivləri əsasında hazırlanan “Xurşidbanu Natəvan” tamaşasının məşqləri ilə məşğuldur. Səhnə əsərində əsas rolları Mehri Nəbiyeva, Məmməd Mehdiyev, Səyyad Məmmədov, eləcə də gənc aktyorlar ifa edirlər. Səhnə əsərində Xurşidbanu Natəvanla yanaşı, Xasay xan Usmiyev, Seyid Hüseyn kimi tarixi şəxsiyyətlərin obrazları da canlandırılır.
Əsas süjet xəttini Xan qızı Natəvanın xalqına, Vətəninə məhəbbəti təşkil edən tamaşanın rejissoru Azərbaycan Respublikasının əməkdar artisti Tofiq Seyidov, rəssamı Naxçıvan Muxtar Respublikasının əməkdar rəssamı Səyyad Bayramov, musiqi tərtibatçısı sənətşünaslıq üzrə fəlsəfə doktoru Natəvan Qədimovadır.
Qeyd edək ki, Prezident İlham Əliyev Xurşidbanu Natəvanın 190 illiyinin qeyd edilməsi haqqında sərəncam imzalayıb. Teatrın peşəkar kollektivinin ərsəyə gətirəcəyi tamaşanı izləyən hər kəs bir daha Vətən sevgisinin, xalq məhəbbətinin bütün istək və duyğulardan yüksəkdə dayandığının şahidi olacaq.
Elnurə Tahir