Tələbələr Naxçıvan teatr sənəti barədə məlumat alıblar - FOTOLAR
NUHÇIXAN İnformasiya Agentliyi xəbər verir ki, hamilik proqramı çərçivəsində Naxçıvan Dövlət Musiqili Dram Teatrının aparıcı aktyorları ilə tələbə-gənclərin görüşü təşkil olunub.
Naxçıvan Muxtar Respublikası Mədəniyyət Nazirliyinə hamiliyə verilmiş Naxçıvan Dövlət Universitetinin “Aktyor sənəti” və Naxçıvan Musiqi Kollecinin “Bədii yaradıcılıq işi” ixtisası üzrə təhsil alan tələbələrin iştirakı ilə “Naxçıvan teatr tarixi: 1883-2022” adlı tədbir keçirilib. Görüşə, tələbələrlə yanaşı Ordubad və Babək rayon xalq teatrlarının gənc üzvləri də dəvət ediliblər.
Tələbələr Naxçıvan Dövlət Musiqili Dram Teatrının 2022-ci il üçün repertuar planı üzrə İlyas Əfəndiyevin “Xurşidbanu Natəvan” əsəri əsasında səhnələşdirilən tamaşanın məşqlərinə baxıb, həmçinin teatrın səhnə texnikaları, paltar və dekorasiya sexləri, rəssam emalatxanası, qrim otaqları ilə tanış olublar.
Mədəniyyət Nazirliyinin əməkdaşı Elvin Əhmədov Naxçıvanda teatr sənətinin inkişafından və bu sahə ilə bağlı görülən tədbirlərdən danışıb.
Xalq artistləri Kamran Quliyev, Rövşən Hüseynov, Naxçıvan Muxtar Respublikasının Əməkdar artisti Səməd Canbaxşiyev gənclərə Naxçıvan teatrının tarixi, keçdiyi inkişaf yolu, teatrda çalışmış tanınmış incəsənət xadimləri haqqında məlumat verib, tələbələrin suallarını cavablandırıblar.
Leyla Cəfərzadə