"Gənclərin teatr dünyası” müsabiqəsinə start verilib - FOTOLAR

Naxçıvan Muxtar Respublikasının Gənclər və İdman, Mədəniyyət nazirlikləri tərəfindən birgə təşkil olunan “Gənclərin teatr dünyası” müsabiqəsinə start verilib.

Naxçıvan Muxtar Respublikası Gənclər və İdman Nazirliyinin mətbuat  xidmətindən NUHÇIXAN İnformasiya Agentliyinə bildirilib ki, iki mərhələli müsabiqənin şərtlərinə əsasən komandalar 14-29 yaşlı gənclərdən ibarət olub. Qiymətləndirmə təqdim edilən tamaşanın aktyor ifası, rejissor şərhi, musiqi tərtibatı və ifaçıların səhnə mədəniyyəti meyarları üzrə aparılır. İlk mərhələdə rayon və şəhərlər üzrə birinci yerə layiq görülən komandalar finala adlayacaq. Həlledici mərhələdə həmin heyətlər bir daha səhnə alacaq və seçimə əsasən mükafatçılar bəlli olacaq.

Tamaşalar Xalq artisti Şirzad Abutalıbov, Əməkdar artist Tofiq Seyidov, Naxçıvan Muxtar Respublikasının Əməkdar rəssamı Səyyad Bayramov və gənc rejissor Həcərxanım Məmmədovadan ibarət münsiflər heyəti tərəfindən qiymətləndirilir.

İlk üçlükdə qərarlaşan komandalar təşkilatçılar tərəfindən mükafatlandırılacaqlar.

Qeyd edək ki, müsabiqə gənclərin asudə vaxtlarını səmərəli təşkil etmək, yaradıcılıq qabiliyyətlərini nümayiş etdirmələri üçün şərait yaratmaq və həvəskar aktyorlar arasından istedadlıları üzə çıxarmaq məqsədilə keçirilir.