Naxçıvan Dövlət Texniki Kollecinin komandası “Sən elə bir zirvəsən” adlı respublika ifa müsabiqəsinin qalibi olub - FOTOLAR
Azərbaycan Respublikası Təhsil Nazirliyinin dəstəyi və Gənclərin Respublika Bədii Yaradıcılıq Evinin təşkilatçılığı ilə ümummilli lider Heydər Əliyevin 99-cu ildönümünə həsr olunmuş “Sən elə bir zirvəsən” adlı respublika ifa müsabiqəsi keçirilib. Naxçıvan Muxtar Respublikası Təhsil Nazirliyinin mətbuat xidmətindən NUHÇIXAN İnformasiya Agentliyinə verilən məlumata görə, 1 fevral – 5 may 2022-ci il tarixlərini əhatə edən müsabiqədə Azərbaycan Respublikası Təhsil Nazirliyi sistemində fəaliyyət göstərən peşə və orta ixtisas təhsili müəssisələrinin tələbələri iştirak ediblər. 3 minə yaxın tələbənin qatıldığı müsabiqə 4 nominasiya üzrə (şeir, bəstəkar mahnıları, təsnif və xalq mahnıları, milli rəqs) 3 mərhələdə keçirilib. Müsabiqənin respublika mərhələsində iştirak edən Naxçıvan Dövlət Texniki Kollecinin komandası rəqs nominasiyası üzrə “Köçəri” yallısı ilə çıxış edərək birinci yerə layiq görülüb.
Müsabiqənin yekununda keçirilən qala konserti və mükafatlandırılma mərasimində qaliblərə təşkilatçıların fəxri fərmanları və hədiyyələr təqdim olunub.
Qeyd edək ki, müsabiqənin Naxçıvan Muxtar Respublikasının peşə və orta ixtisas təhsili müəssisələri üzrə 20 aprel 2022-ci il tarixdə keçirilən zona müsabiqəsində Naxçıvan Dövlət Texniki Kollecinin tələbələri birinci yerə layiq görülərək respublika müsabiqəsində yarışmağa haqq qazanmışdı.