“Yadplanetli” filmindəki baş qəhrəmanın mexaniki modeli hərraca çıxarılacaq

Rejissoru Stiven Spilberq olan məşhur fantastik “Yadplanetli” filminin pərəstişkarları ekran əsərində istifadə edilmiş baş qəhrəmanın mexaniki modelinə sahib olmaq şansını əldə edəcəklər.

NUHÇIXAN İnformasiya Agentliyi kinonews saytına istinadla xəbər verir ki, 1981-ci ildə Karlo Rambaldinin emalatxanasında yaradılan bənzəri olmayan bu qeyri-adi kinematoqrafik model 85 hərəkət nöqtəsinə malikdir və mühəndisliyin şah əsəri hesab olunur.

Mexaniki maneken kuklanın yaradılması təxminən üç ay çəkib və onun dəyəri 1,5 milyon dollara başa gəlib. Bu da filmin ümumi büdcəsinin təxminən onda birini təşkil edir. Bundan əlavə, modelin bir sıra illüstrasiya və çertyojları da hərraca çıxarılacaq. Təşkilatçılar yadplanetli modelinin yekun dəyərinin iki milyondan üç milyon dollara qədər olacağını gözləyirlər. Hərrac dekabrın 17-də başlayacaq.

Qeyd edək ki, "Yadplanetli" fantastik filmi 1982-ci ildə ekranlara çıxıb. S.Spilberqin filmində əsas rolları Henri Tomas, Di Uolles və Dryu Berrimor canlandırıblar. Süjetin mərkəzində yer üzündə unudulmuş mehriban yadplanetliyə evə qayıtmağa kömək edən oğlan Elliot və onun bacısı Gertidir.

Film “Ən yaxşı orijinal musiqi” və “Ən yaxşı vizual effektlər” nominasiyası daxil olmaqla dörd “Oskar” mükafatı qazanıb.