Sədərəkdə “Xurşidbanu Natəvan” tamaşası nümayiş etdirilib - FOTOLAR

NUHÇIXAN İnformasiya Agentliyi xəbər verir ki, Naxçıvan Dövlət Milli Dram Teatrının kollektivi xalq yazıçısı İlyas Əfəndiyevin “Xurşidbanu Natəvan” əsəri əsasında hazırladığı eyniadlı tamaşanı Sədərəkdə nümayiş etdirib.

Sədərək Rayon Mədəniyyət Sarayında təqdim olunan tamaşanın quruluşçu rejissoru Əməkdar artist Tofiq Seyidov, quruluşçu rəssamı Əməkdar rəssam Səyyad Bayramov, musiqi tərtibatçısı sənətşünaslıq üzrə fəlsəfə doktoru Natəvan Qədimovadır.

Tamaşa Qarabağ xanlarının varisi, bu il anadan olmasının 190 illiyini qeyd etdiyimiz görkəmli şair Xurşidbanu Natəvan şəxsiyyətindən bəhs edir. Xalqın rifahı naminə əcdadlarından qalmış mülkləri belə bu yolda sərf etməkdən çəkinməyən Natəvanın keşməkeşli həyatı və yaradıcı fəaliyyəti tamaşada rəngarəng boyalarla əks etdirilib.

Tamaşada əsas rolları Əməkdar artistlər Vidadi Rəcəbli, Bəhruz Haxverdiyev, Əbülfəz İmanov, gənc aktyorlar Mehri Nəbiyeva, Səyyad Məmmədov, Ələsgər Quliyev, Anar Eyvazov, Məmməd Mehdiyev, Uğur Nəsirli, Səkinə Məmmədova və digərləri ifa ediblər.

Səhnə əsəri tamaşaçılar tərəfindən maraqla qarşılanıb.

                                                                               Adilə Səfərova