Naxçıvanda bayram günlərində teatr müəssisələri maraqlı repertuarla tamaşaçı qarşısına çıxacaq
Naxçıvan Muxtar Respublikası Mədəniyyət Nazirliyinin tabeliyində fəaliyyət göstərən dövlət teatrları tərəfindən bayram günlərində maraqlı tamaşaların nümayişi nəzərdə tutulub.
Naxçıvan Muxtar Respublikasının Mədəniyyət Nazirliyinin mətbuat xidmətindən NUHÇIXAN İnformasiya Agentliyinə verilən məlumata görə, Cəlil Məmmədquluzadə adına Naxçıvan Dövlət Milli Dram Teatrının kollektivi 1 və 2 yanvar tarixlərdə Vaqif Səmədoğlunun “Mamoy kişinin yuxuları”, 3 və 4 yanvar tarixlərdə isə İlyas Əfəndiyevin “Xurşidbanu Natəvan” əsərləri əsasında səhnələşdirilmiş eyniadlı tamaşalarla teatrsevərlərin görüşünə gələcək. Tamaşalar saat 17:00-da başlayacaq.
Məhəmməd Tağı Sidqi adına Naxçıvan Dövlət Kukla Teatrının yaradıcı kollektivi uşaqlara bayram sovqatı olaraq H.X.Andersenin “Qar Kraliçası”, Ə.Qasımovun “İnanmayaq tülkülərə”, Ə.Abbasovun “Keçinin qisası”, N.İsmayılzadənin “Ağca və Bozca” əsərləri əsasında hazırlanmış tamaşalarla 1-4 yanvar tarixlərdə hər gün saat 10:00, 12:00, 14:00 və 15:30 olmaqla balaca tamaşaçılara yeni il sevincləri bəxş edəcək.
Naxçıvan Dövlət Uşaq Teatrının bayram sovqatında isə N.Nəzərovanın “Mavi işıq” pyesi və Qrimm Qardaşlarının “Bremen musiqiçiləri” nağılı əsasında səhnələşdirilən eyniadlı tamaşalar yer alır. “Mavi işıq” tamaşası yanvarın 1-də saat 12:00 və 14:00-da, yanvarın 3-də isə saat 11:00 və 14:00-da, “Bremen musiqiçiləri” tamaşası 2 və 4 yanvar tarixlərdə saat 11:00 və 14:00-da nümayiş olunacaq
Tamaşaçılarımıza bayram əhvali-ruhiyyəsi, sevinc dolu günlər, yeni ili xoş ovqatla qarşılamaq arzu edirik.