Naxçıvanda uşaq bağçalarında D vitaminin paylanması üçün xeyriyyə aksiyalarına başlanılıb - VİDEO
Naxçıvan Muxtar Respublikası Səhiyyə Nazirliyi tərəfindən “Konstitusiya və Suverenlik İli” çərçivəsində muxtar respublika ərazisində fəaliyyət göstərən uşaq bağçalarında təlim-tərbiyə alan uşaqlara 5 min ədəd D vitamininin paylanması üçün xeyriyyə aksiyasına başlanılıb.
Nazirliyin mətbuat xidmətindən NUHÇIXAN-a bildirilib ki, bu təşəbbüs, ilk dəfə olaraq muxtar respublika ərazisində həyata keçirilir. Layihənin əsas məqsədi uşaqların sağlam inkişafına dəstək vermək, onların immun sistemini gücləndirmək və vitamin çatışmazlığının qarşısını almaqdır.
Aksiyanın açılışı Naxçıvan Muxtar Respublikası Təhsil Nazirliyinin dəstəyi ilə Naxçıvan şəhər 8 saylı uşaq bağçası-körpələr evində baş tutub. Tədbirdə Səhiyyə və Təhsil nazirliklərinin əməkdaşları, bağça direktorları, Zərifə Əliyeva adına Naxçıvan Şəhər Poliklinikasının həkim heyəti və valideynlər iştirak ediblər. Açılış mərasimi uşaqlar üçün əyləncəli şou proqramı ilə davam etdirilib.
Layihə çərçivəsində Zərifə Əliyeva adına Naxçıvan Şəhər Poliklinikasının həkim heyəti muxtar respublika üzrə fəaliyyət göstərən uşaq bağçalarında tibbi müayinələr həyata keçirəcək, valideynlərlə maarifləndirici söhbətlər aparacaq və uşaqlara D vitamini paylanılmasını davam etdirəcək.
Bu xeyriyyə aksiyası muxtar respublikada uşaqların sağlamlığının qorunması və gələcək nəslin rifahının təmin olunması istiqamətində atılan mühüm addımlardan biridir.