“Omikron”un mövsümi qrip kimi qiymətləndirilməsi yoluxmanın çoxalmasına səbəb olur

Yeni növ koronavirusa yoluxma statistikasında hər gün rəqəmlər artır. Mütəxəssislər bildirirlər ki, yoluxmanın artmasının səbəbi bir çox insanların xəstəliyi simptomsuz keçirməsidir. İnsanlar xəstə olduğunu bilmir və gündəlik işlərinə davam edərək ictimai yerlərdə başqalarını da yoluxdururlar.

NUHÇIXAN İnformasiya Agentliyi xəbər verir ki, həkim-infeksionist Nigar Əliyeva deyib: "Koronavirusun “omikron” ştamının çox yüksək yoluxduruculuq xüsusiyyəti var. Hətta virusun yoluxduruculuğu o qədər yüksək, inkubasion dövrü o qədər qısadır ki, bir neçə gün, hətta sutka ərzində yoluxmadan sonrakı kliniki əlamətlər dərhal üzə çıxır. Nəzərə alsaq ki, assimptomatik və kliniki əlamətləri çox zəif olan vətəndaşlar yaxma verməyə ehtiyac duymurlar, onda yoluxmanın daha çox olduğu aşkar olar. Getdikcə yoluxma sayındakı rəqəmlərin artacağı da gözlənilir. Ona görə də vətəndaşlar cüzi zökəm və ya hər hansı bir kliniki əlamət hiss edəndə özlərini təcrid etməli, kollektiv arasına çıxmamalıdırlar. Xəstəlik yüngül keçir, demək olar ki, ağırlaşmalar çox az müşahidə olunur, ona görə də çox vaxt onu adi mövsümi qrip kimi qiymətləndirir və təcrid olunmağa ehtiyac görmürlər. Bu isə xəstəliyin sürətlə yayılmasına və artmasına səbəb olur”.

Qeyd edək ki, “omikron” ştamında boğaz ağrısı, öskürək, temperaturun o qədər də yüksək olmaması, mutasiya dövrünün isə olduqca qısa olması halları müşahidə edilir. Yorğunluq, halsızlıq hallarının çoxalması da xəstəliyin kliniki əlamətlərindəndir.