Naxçıvan Azərbaycanın ümumi siyasi-hüquqi mexanizminə tam inteqrasiya olunur
Naxçıvan Muxtar Respublikası Ali Məclisinin yaz sessiyasının növbəti iclasında muxtar respublikanın idarəçilik sistemində mühüm dəyişikliklər nəzərdə tutan qanun layihəsi müzakirəyə çıxarılıb. “Naxçıvan Muxtar Respublikasının Konstitusiyasında dəyişikliklər edilməsi haqqında” qanun layihəsi qəbul edilib, bu isə Naxçıvanda idarəetmənin yeni mərhələyə qədəm qoyduğunu göstərir.
Ali Məclisin birinci müavini Bəxtiyar Məmmədov bildirib ki, muxtar respublikada struktur islahatları, yeni idarəçilik qaydalarının tətbiqi və qanunvericiliyin təkmilləşdirilməsi kimi addımlar konstitusiya dəyişikliklərini qaçılmaz edib. Xüsusilə, son dövrlərdə Naxçıvanda səlahiyyətli nümayəndəlik institutunun yaradılması və dövlət orqanlarının yenidən formalaşdırılması prosesi aparılır ki, bu da idarəetmədə çevikliyin artırılmasına yönəlib.
Bu dəyişikliklər yalnız muxtar respublika çərçivəsində deyil, həm də Azərbaycanın ümumi idarəçilik sisteminə uyğunlaşdırılma baxımından əhəmiyyətlidir. Son illərdə ölkədə həyata keçirilən mərkəzləşdirilmiş idarəetmə modeli təkcə Bakıda deyil, həm də regionlarda tətbiq olunmağa başlanıb. Naxçıvanın da bu modelə uyğunlaşması, idarəçilik sisteminin Azərbaycan Respublikasının ümumi siyasi-hüquqi mexanizminə tam inteqrasiya olunması məqsədilə həyata keçirilir.
Qanun layihəsinin qəbulu, əslində, Naxçıvanda köhnə idarəçilik modelindən uzaqlaşmaq və daha effektiv idarəetmə sisteminə keçmək üçün atılan mühüm addımdır. Birincisi, yeni idarəetmə modeli çərçivəsində Naxçıvanın rəhbər strukturlarında səlahiyyət bölgüsünün təkmilləşdirilməsi gözlənilir. Bu, yerli idarəetmə orqanlarının fəaliyyətini daha səmərəli etməklə mərkəzi hökumətlə daha sıx əlaqəni təmin edəcək. İkincisi, Konstitusiya dəyişikliyi Naxçıvanda hüquqi sistemin daha effektiv işləməsini təmin etməyə hesablanıb. Dövlət orqanlarının yenidən formalaşdırılması, vətəndaşların hüquqlarının daha sistemli şəkildə qorunmasına yönəlib. Üçüncüsü, son illərdə Naxçıvanda idarəçilik sisteminin yenilənməsi prosesi çərçivəsində köhnə, səmərəsiz institutların yeniləri ilə əvəz olunması müşahidə edilir. Bu dəyişikliklər konstitusiya səviyyəsində təsdiq edilmədən tam hüquqi qüvvəyə minə bilməzdi.
Qanun layihəsi Ali Məclisdə qəbul edildikdən sonra Milli Məclisə təqdim olunacaq. Bu isə onu göstərir ki, Naxçıvanın yeni idarəçilik modeli bütövlükdə Azərbaycanın dövlət idarəçiliyinin bir hissəsi kimi formalaşdırılır və tənzimlənir.
Ali Məclisin iclasında həmçinin “Naxçıvan Muxtar Respublikasında insan hüquqlarının qorunması haqqında” Ombudsmanın 2024-cü il üzrə məruzəsi də müzakirə edilib. Bu, göstərir ki, konstitusiya dəyişiklikləri təkcə inzibati və struktur dəyişikliklərinə deyil, həm də insan hüquqları sahəsində islahatlara təsir edəcək.
İslahatların və yeni idarəçilik modelinin tətbiqi ilə Naxçıvanda hüquq və azadlıqların təminat mexanizmləri gücləndiriləcək, dövlət-vətəndaş münasibətlərinin daha şəffaf və demokratik olması üçün hüquqi baza möhkəmləndiriləcək. Bu proses həm idarəetmə strukturunun optimallaşdırılması, həm də hüquqi sistemin təkmilləşdirilməsi baxımından əhəmiyyətlidir. Bu dəyişikliklər daha çevik və səmərəli idarəetmə modeli yaradaraq, həm Naxçıvanın inkişafını sürətləndirəcək, Naxçıvanda idarəçilik tamamilə yeni mərhələyə qədəm qoyacaq.
MTM Analitik Qrup