Vüqar Rəhimzadə: Azərbaycan Almaniya üçün strateji əhəmiyyət kəsb edən ölkədir

Bütün dövlətlərlə bərabərhüquqlu, qarşılıqlı maraq və hörmət prinsipləri əsasında əlaqələr quran Azərbaycan xarici siyasətində Avropa ölkələri ilə əməkdaşlığa xüsusi önəm verir. Avropa İttifaqı (Aİ), eyni zamanda, quruma üzv dövlətlərlə əlaqələrin hazırkı inkişaf səviyyəsi göz qabağındadır. Məlumdur ki, Azərbaycanla Avropa İttifaqına üzv olan 10 ölkə arasında strateji tərəfdaşlığa dair Memorandum imzalanıb. Ölkəmiz əməkdaşlıqda qarşılıqlı etimad mühitinin qorunmasını ən vacib məsələ kimi önə çəkir. Tarixi Zəfərimizdən, ərazi bütövlüyümüzün və suverenliyimizin tam bərpa edilməsindən sonra Azərbaycanın beynəlxalq münasibətlər sistemində möhkəmlənən mövqeyi diqqətdən kənarda qalmır. Bu, qarşılıqlı səfərlərin dinamikasında, yeni hədəflərin müəyyənləşdirilməsində, Azərbaycanın mövqeyinə xüsusi önəm verilməsində özünün aydın ifadəsini tapır. Bir sözlə, ölkəmizin xarici siyasət uğurlarının davamlılığı üçün çox mühüm amillər mövcuddur. Daim ədalətin və beynəlxalq hüququn yanında olan Azərbaycana beynəlxalq baxış yüksək səviyyədədir.

Dövlətimizin başçısı İlham Əliyevin aprelin 2-də ölkəmizdə rəsmi səfərdə olan Almaniya Federativ Respublikasının Prezidenti Frank-Valter Ştaynmayer ilə keçiridyi təkbətək və geniş tərkibdə görüşlərdə, prezidentlərin mətbuata birgə bəyanatlarında, eyni zamanda, jurnalistlərin suallarına cavablarında da bu məqamlar xüsusi olaraq diqqətə çatdırıldı. Reallıq budur ki, Azərbaycan Avropa üçün strateji əhəmiyyət daşıyan ölkədir. Diplomatik münasibətlərinin 30 ildən artıq dövrünü arxada qoyan Azərbaycan-Almaniya əlaqələrinin tarixinə qısa nəzər saldıqda görürük ki, ölkələrimiz arasında müxtəlif sahələrdə əməkdaşlıq yüksələn xətlə inkişaf edir. Xalqlarımız arasında əlaqələrin isə daha dərin kökləri vardır. Azərbaycan dövləti və xalqı ölkəmizdə alman tarixi və mədəni irsinə böyük hörmətlə yanaşır, onun qorunub-saxlanılmasını təmin edir. Eyni zamanda, bu gün Azərbaycan ilə Almaniya arasında siyasi əlaqələr yüksək səviyyədədir, ali səviyyəli dialoq mövcuddur. 

Bu fikirləri Milli Məclisin deputatı Vüqar Rəhimzadə KİV-ə açıqlamasında bildirib.

Millət vəkili vurğulayıb ki, Almaniya Azərbaycanın Avropada ən vacib siyasi-iqtisadi tərəfdaşlarından biridir. Dövlət başçısı İlham Əliyev mətbuata bəyanatında bu reallığı əsaslı şəkildə diqqətə çatdırdı. Bildirdi ki, iqtisadi sahədə əldə edilmiş nəticələr bizi ruhlandırır. Çünki bu ilin yanvar-fevral aylarında ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə gələcək illərdə ticarət dövriyyəmizin şaxələndirilməsi ilə bağlı, xüsusilə bərpaolunan enerji sahəsində daha fəal addımlar atılacaq. Almaniya şirkətlərinin çox böyük təcrübəsi var. Azərbaycanın da çox böyük proqramı, planları var. Ölkəmiz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindədir. Bu, tam realdır, bunun bir hissəsi Avropaya ixrac ediləcəkdir.

Vüqar Rəhimzadə qeyd edib ki, prezidentlərin görüşlərində, mətbuata bəyanatlarında əsas diqqət göstərilən məsələlərdən biri Azərbaycanın ötən il COP29 kimi mötəbər iqlim konfransına ev sahibliyi oldu. İqlim diplomatiyasında dönüş nöqtəsi kimi dəyərləndirilən bu tədbir, eyni zamanda, çoxtərəfliliyin təntənəsi oldu. COP29-da 197 ölkəni təmsil edən 77 mindən çox iştirakçı qeydiyyatdan keçdi və bu konfrans böyük, uğurlu nəticələrlə diqqətdə oldu. Mətbuata bəyanatında “İştirak etməyən yeganə ölkə Ermənistan olmuşdur” söyləyən dövlət başçısı İlham Əliyev bildirdi ki, bu, təəssüf hissi doğurur. Çünki Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Prezident İlham Əliyev, eyni zamanda, tarixi Zəfərimizdən sonra Azərbaycanın Ermənitsana təklif etdiyi sülh müqaviləsindən də bəhs etdi. Azərbaycanın 30 il erməni işğalından əziyyət çəkdiyini, xalqımızın etnik təmizləməyə məruz qaldığını, bir milyon azərbaycanlının erməni aqressiyasına görə evsiz-eşiksiz qaldığını, torpaqlarımızın təxminən 20 faizinin işğal altına düşdüyünü bir daha almaniyalı həmkarının diqqətinə çatdıran dövlət başçısı İlham Əliyev təəssüf hissi ilə qeyd etdi ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz tarixi Zəfərimiz sülh danışıqlarına yol açdı. Bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır.

Milli Məclisin deputatı hər bir səfərin münasibətlərdə yeni səhifənin başlanğıcı olduğunu önə çəkərək vurğulayıb ki, bu səfərin çox müsbət nəticələri olacaq. İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Səfərin yekunları ölkələrimizi bir-birinə daha yaxın edəcəkdir. Qarşılıqlı səfərlər əlaqələrin daha da möhkəmləndirilməsində əhəmiyyətli rol oynayır. Prezident İlham Əliyevin indiyədək Almaniyaya iki rəsmi, 10-dan artıq işgüzar səfəri olub. Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin regionda lider mövqeyini, həmçinin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəkləyir. Almaniya Prezidenti Frank-Valter Ştaynmayer mətbuata bəyanatından sonra jurnalistlərin suallarını cavablandırarkən bu mühüm amili xüsusi vurğuladı ki, biz regionda qeyri-sülh şəraiti ilə heç vaxt barışmamışıq. Bir tərəfin digər tərəfə ərazi iddialarına heç vaxt dəstək verməmişik. Beynəlxalq səviyyədə tanınmış sərhədlər qüvvədə olmalıdır, tanınmalıdır və onlara hörmətlə yanaşılmalıdır. Almaniyanın mövqeyinə gəldikdə öz xəttimizə, mövqeyimizə həmişə sadiq olmuşuq. Azərbaycanla Ermənistan arasında sülh müqaviləsinin imzalanması məsələsinə gəldikdə isə Frank-Valter Ştaynmayer qeyd etdi ki, istəyirik iki dövlət arasında qeyri-sülh dövrü geridə qalsın və sabitlik gətirəcək yeni bir gələcək yaransın. Həm Ermənistan, həm də Azərbaycan üçün Cənubi Qafqaz sülhün bərqərar olduğu regiona çevrilməlidir.

Vüqar Rəhimzadə bildirib ki, Almaniya, həmçinin Azərbaycanın Avropanın enerji təhlükəsizliyinin təmin olunmasında mühüm rolunu təqdir edir. Xatırlatmaq yerinə düşər ki, 2022-ci ilin iyulun 18-də Azərbaycan Prezidenti İlham Əliyev və Avropa Komissiyasının Prezidenti xanım Ursula Fon der Lyayen tərəfindən enerji sahəsində Strateji Tərəfdaşlığa dair Anlaşma Memorandumu imzalanıb. Sənədə əsasən, Azərbaycan 2027-ci ilə qədər Avropaya təbii qazın təchizat həcmini ən azı iki dəfə artırmağı planlaşdırır. Bu sənəd, eyni zamanda, Azərbaycan ilə Aİ arasında bərpaolunan enerji sahəsində əməkdaşlığın inkişaf etdirilməsini nəzərdə tutur.

Millət vəkili Azərbaycan-Almaniya münasibətlərinə qısa baxış əsasında bu qənaəti bildirib ki, iki ölkənin əməkdaşlığının uğurlu gələcəyi üçün bütün imkanlar mövcuddur. Hər iki tərəf əlaqələrin inkişafında maraqlıdır. Almaniya Prezidenti bu reallığı da xüsusi vurğuladı ki, Azərbaycan inkişaf edərək mühüm məkana çevrilib. Buradan olduqca vacib ticarət yolları keçir, öz növbəsində həmin amil dünyanın birləşməsinə əsas ola bilər. Yalnız Mərkəzi Asiya ilə deyil, həm də Uzaq Şərqlə, o cümlədən Cənub-Qərbi Asiya və Çinlə Almaniyanın ticarət əlaqələrində Azərbaycanın böyük rolu var. Azərbaycandan keçən yollar, həmçinin Orta Dəhlizin rolu alman iqtisadiyyatı üçün vacibdir, yaxşı perspektivdir və bu, daha maraqlı olacaq. 

Aparılan müzakirələrdə, prezidentlərin mətbuata bəyanatlarında belə bir əminlik ifadə olundu ki, Azərbaycan ilə Almaniya arasında istər ikitərəfli, istərsə də Avropa İttifaqı çərçivəsində fəal əməkdaşlıq əlaqələri bundan sonra da ölkələrimizin və xalqlarımızın rifahına xidmət edəcək. Almaniya Prezidenti hazırda çox sürətli və dramatik dəyişikliklərin baş verdiyi dünyada yaşadığımızı önə çəkərək belə bir çağırışı səsləndirdi ki, beynəlxalq hüququn qorunması, dünyanın tənzimlənən əsaslarla inkişaf etməsində marağımız da bizi birləşdirir və biz gələcək nəsillərə də düzənsiz dünyanı qoyub getmək istəmirik.