Türkiyə Azərbaycanın mina problemi ilə bağlı yaranmış təhlükəsizlik narahatlıqlarını bölüşür

Türkiyə Azərbaycanın mina problemi ilə bağlı yaranmış təhlükəsizlik narahatlıqlarını bölüşür.

NUHÇIXAN xəbər verir ki, bu barədə Türkiyə Xarici İşlər Nazirliyi məlumat yayıb.

"Biz mina çirklənməsinin uzun müddətdir ciddi təhlükə yaratdığı Əfqanıstan kimi ölkələrin, eləcə də işğaldan azad edilmiş ərazilərdə çoxlu sayda minanın hələ də aşkar edilmədiyi Azərbaycanın təhlükəsizlik narahatlıqlarını bölüşürük", - məlumatda qeyd edilib.

Bildirilib ki, BMT Baş Assambleyası minaların və partlamamış sursatların təhlükəsinə diqqət çəkmək üçün aprelin 4-nü Beynəlxalq Mina Xəbərdarlığı və Minatəmizləmə Fəaliyyətinə Yardım Günü olaraq təyin edib.

Vurğulanıb ki, Türkiyə quru və dəniz minalarına qarşı mübarizədə qlobal və regional miqyasda həlledici və fəal rol oynayan bir ölkə olaraq Milli Mina Fəaliyyəti Mərkəzi vasitəsilə "Piyada əleyhinə minaların istifadəsi, yığılması, istehsalı və ötürülməsinin qadağan edilməsi və onların məhv edilməsi haqqında" Ottava Konvensiyasını və onun çərçivəsində qurulan beynəlxalq əməkdaşlığı dəstəkləyir.

"Mina çirklənməsi və partlamamış sursatlar bu gün bir çox ölkələrdə insan təhlükəsizliyinə ciddi təhdid yaratmağa davam edir, sosial-iqtisadi inkişafa və mədəni irsin qorunmasına mənfi təsir göstərir. Mina təhlükəsi ilə mübarizə aparan ölkələrə həm quruda, həm dənizdə, həm də beynəlxalq platformalarda qətiyyətli dəstəyimiz davam edəcək", - məlumatda əlavə edilib.