Ali nümayəndə: Avropa İttifaqı Azərbaycanın ən böyük ticarət tərəfdaşıdır
Avropa İttifaqı Azərbaycanın ən böyük ticarət tərəfdaşıdır.
NUHÇIXAN xəbər verir ki, bunu Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas Azərbaycanın xarici işlər naziri Ceyhun Bayramovla aprelin 25-də keçirdiyi birgə mətbuat konfransında deyib.
O bildirib ki, Avropa İttifaqı, eyni zamanda, Azərbaycanda minaların təmizlənməsi prosesinə töhfə verməkdədir və ölkədə münaqişənin izlərinin aradan qaldırılması istiqamətində səylərini davam etdirəcək.
“Biz Azərbaycanla ticarət əlaqələrimizi yeni razılaşma əsasında daha da genişləndirməyi planlaşdırırıq”, - deyə Avropa İttifaqının xarici işlər və təhlükəsizlik siyasəti üzrə ali nümayəndəsi vurğulayıb.
Görüşdə Azərbaycan və Ermənistan arasında əlaqələrin normallaşdırılması mövzusunda da çox səmərəli müzakirələr apardıqlarını bildirən Kaya Kallas əlavə edib: “İki ölkə arasında münasibətlərin gücləndirilməsi, sülh sazişinin dayanıqlı və davamlı olması istiqamətində göstərilən səylərə Avropa İttifaqı olaraq dəstəyimizi ifadə edirik. Sülh sazişinin mətn hissəsinin razılaşdırılmasını məmnuniyyətlə qarşılayıram və ümid edirəm ki, növbəti addımlar daha məhsuldar olacaq”.