Naxçıvanda Türkiyənin Zəfər bayramı qeyd olunub - FOTOLAR
NUHÇIXAN xəbər verir ki, avqustun 29-da Türkiyənin Naxçıvandakı Baş Konsulluğunun iqamətgahında Türkiyə Respublikasının Zəfər bayramı və Türkiyə Silahlı Qüvvələri Günü münasibətilə tədbir keçirilib.
Tədbirdə Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, Türkiyənin Naxçıvandakı baş konsulu Asip Kaya, dövlət və hökumət rəsmiləri,Ali Məclisin deputatları, eləcə də ictimaiyyət nümayəndələri iştirak ediblər.
Əvvəlcə qardaş xalqlarımızın şəhidlərinin əziz xatirəsi bir dəqiqəlik sükutla yad edilib, Azərbaycan və Türkiyə respublikalarının Dövlət himnləri səsləndirilib.
Türkiyə Respublikasının Naxçıvan Muxtar Respublikasındakı baş konsulu Asip Kaya qonaqları salamlayıb, Türkiyə Respublikasının Prezidenti Rəcəb Tayyib Ərdoğanın Zəfər bayramı münasibətilə ölkənin xaricdəki diplomatik nümayəndəliklərinə göndərdiyi təbrik məktubunu oxuyub.
Asip Kaya Azərbaycanın ölkəsinə qurtuluş savaşında çox böyük dəstək göstərdiyini bildirərək xalqının bu qardaş dəstəyini daim minnətdarlıqla xatırlayacağını qeyd edib. Baş konsul vurğulayıb ki, türk tarixinin ən böyük zəfərlərindən biri də Azərbaycan xalqının 44 günlük Vətən müharibəsində qazandığı parlaq qələbəsidir. Qarabağ zəfərinin ən mühüm nəticələrindən biri Zəngəzur dəhlizinin reallaşması olacaqdır. 8 avqust Vaşinqton razılaşması bu istiqamətdə olduqca önəmli addımdır. Zəngəzur dəhlizinin mühüm bir hissəsi olan Qars-İğdır-Naxçıvan dəmir yolu xəttinin təməli qoyulub. Türkiyə və Azərbaycanın ortaq təşəbbüsü ilə əsası 2009-cu ildə Naxçıvanda keçirilən zirvə toplantısında qoyulmuş Türk Dövlətləri Təşkilatı hər keçən gün daha da güclənir. Zəngəzur dəhlizinin açılması ilə türkün qapısı Naxçıvan üzərindən Türk dünyası yenidən bir-birinə qovuşacaq. Asip Kaya Naxçıvanın “Türk dünyası əsri”nin inşasında önəmli rol oynayacağına inamını ifadə edib.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli qardaş Türkiyə xalqını Zəfər bayramı və Türkiyə Silahlı Qüvvələri Günü münasibətilə təbrik edərək bildirib ki, Azərbaycan-Türkiyə münasibətləri bu gün bütün dünyada nümunə göstərilən qardaşlıq və strateji tərəfdaşlıq səviyyəsinə yüksəlib. Prezident cənab İlham Əliyev və Prezident cənab Rəcəb Tayyib Ərdoğanın müdrik və uzaqgörən siyasəti nəticəsində əlaqələrimiz daim inkişaf edir, hər sahədə yeni məzmun qazanır. Xüsusilə son dövrlərdə atılan addımlar tarixi hadisələrdir. Zəngəzur dəhlizi açıldıqdan sonra Azərbaycan və Türkiyə arasındakı əlaqələr yeni strateji müstəviyə yüksələcək, Türk dünyası coğrafi baxımdan birləşəcək, regional iqtisadi əməkdaşlıq daha da genişlənəcək. Zəngəzur dəhlizi yalnız iki dövlətin deyil, bütün Türk dünyasının gələcəyinə xidmət edən tarixi bir layihədir. Bu yaxınlarda istifadəyə verilmiş İğdır-Naxçıvan qaz kəməri ölkələrimiz arasındakı enerji əməkdaşlığının mühüm göstəricisidir. Eyni zamanda Qars-İğdır-Naxçıvan dəmir yolunun təməlinin qoyulması da tariximizə qızıl hərflərlə yazılacaq hadisədir. Bu dəmir yolu təkcə Azərbaycan və Türkiyə arasında deyil, bütövlükdə, Türk dünyasını birləşdirən, regionda iqtisadi əlaqələri və logistik imkanları genişləndirən mühüm layihədir.
Xalqlarımızın hər zaman bir-birinin yanında olduğunu diqqətə çatdıran Fuad Nəcəfli bildirib ki, Azərbaycan xalqı 2023-cü ilin fevralında Türkiyədə baş vermiş dağıdıcı zəlzələ zamanı da qardaş Türkiyənin yanında oldu. Bu qardaşlığın davamı olaraq Kahramanmaraşda “Azərbaycan” məhəlləsinin istifadəyə verilməsi yalnız yaşayış kompleksi deyil, həm də xalqlarımızın sarsılmaz birliyinin əbədi rəmzinə çevrildi.
Səlahiyyətli nümayəndə əminliklə deyib ki, Azərbaycan-Türkiyə münasibətləri gələcəyə hesablanmış, sarsılmaz təməllər üzərində qurulmuş münasibətlərdir. Bu münasibətlər xalqlarımızın iradəsindən güc alır, dövlət başçılarımızın müdrik siyasəti ilə möhkəmlənir. Azərbaycan-Türkiyə qardaşlığı təkcə iki dövlətin dostluğu deyil, həm də bütün Türk dünyasının gələcəyidir. Bu qardaşlıq daim yaşayacaq, yeni nəsillərə ötürüləcək və hər iki ölkənin uğurları bir-birinə dayaq olacaq.
Tədbir rəsmi ziyafətlə davam edib.