Anar Quliyev: Azərbaycanın Qlobal Şəhər Gündəliyinə sadiqliyi uzunmüddətli və məzmunludur

Biz "Bakı Şəhərsalma Mükafatını" beynəlxalq qonaqları olan milli mükafat kimi təsəvvür etmirik, biz onu Azərbaycanı ev sahibi edən qlobal mükafat kimi görürük. Onun gələcək dövrləri hər regiona və hər gəlir səviyyəsinə açıq olacaq.

NUHÇIXAN xəbər verir ki, bu sözləri "Bakı Şəhərsalma mükafatı: Mənzil həllərini qlobal təsir üçün genişləndirmə" adlı tədbirdə WUF13-ün milli koordinatoru, Dövlət Şəhərsalma və Arxitektura Komitəsinin sədri Anar Quliyev deyib.

"Azərbaycanın Qlobal Şəhər Gündəliyinə sadiqliyi uzunmüddətli və məzmunludur. Biz COP29-a ev sahibliyi etdik və dayanıqlı, sağlam şəhərlər üçün çoxşaxəli fəaliyyət istiqamətlərini və Bakı Davamlılıq Koalisiyasını işə saldıq. Qeyd edildiyi kimi, biz hazırda Somalili dostlarımızla birlikdə UN Habitat-ın “Hamı üçün münasib mənzil” üzrə Hökumətlərarası İşçi Qrupunun həmsədrliyik. Biz WUF13-ə ev sahibliyi edirik və bu gün UN-Habitat ilə birlikdə daimi qlobal bir alətin təsisçisiyik. Biz bu addımların hər birinə sadiqik və bütün dünyadakı hökumətləri, şəhərləri, maliyyə institutlarını, akademiyanı, mütəxəssisləri və vətəndaş cəmiyyəti tərəfdaşlarını bu yolu bizimlə birlikdə getməyə dəvət edirik", - deyə Anar Quliyev bildirib.