Rəşad Nəbiyev: Bakı-Tbilisi-Qars Xəzər və Qara dənizlər arasında ən rəqabətqabiliyyətli tranzit marşrutudur
2017-ci ilin oktyabrında Azərbaycan, Türkiyə və Gürcüstan prezidentləri Ələt Limanında bir araya gələrək Bakı-Tbilisi-Qars (BTQ) dəmir yolu xəttini açdılar. Həmin an Avrasiya bağlantıları tarixində yeni bir səhifə açdı. Lakin bu, yalnız başlanğıc idi. Belə iddialı bir dəhliz davamlı investisiya və davamlı siyasi iradə tələb edir. Azərbaycan bu öhdəliyə sadiq qaldı. Biz xəttin Gürcüstan ərazisindən keçən 184 kilometrlik hissəsinə sərmayə qoyduq: 13 dəmir yolu stansiyası, 55 körpü, 8 dartı yarımstansiyası, 320-dən çox bina və mühəndis qurğusu beş mərhələdə yenidən quruldu.
NUHÇIXAN xəbər verir ki, bu sözləri Azərbaycanın rəqəmsal inkişaf və nəqliyyat naziri Rəşad Nəbiyev BTQ dəmir yolunun rəsmi açılış mərasimində çıxışı zamanı deyib.
Onun sözlərinə görə, görülən işlər adi təmir deyildi, bu, BTQ-ni Orta Dəhlizin əsl onurğa sütununa çevirmək üçün verilmiş məqsədyönlü və strateji qərar idi.
“Nəticə göz qabağındadır: xəttin ötürücülük qabiliyyəti beş dəfə artırılaraq ildə 5 milyon tona çatdırılıb. Bu gün BTQ Xəzər və Qara dənizlər arasında ən rəqabətqabiliyyətli tranzit marşrutudur. İki həftə əvvəl Bakıda keçirilən Ümumdünya Şəhərsalma Forumunda, Prezident İlham Əliyevin və Baş nazir İrakli Kobaxidzenin iştirakı ilə Marabda-Kartsaxi hissəsinin reabilitasiyasını yekunlaşdıran protokol imzalandı. Belə miqyaslı layihələr öz-özünə baş vermir. Onlar bu layihələrə inanan və uzunmüddətli öhdəlikləri üzərinə götürən liderlər tələb edir. Əldə etdiklərimizin heç biri Prezident İlham Əliyevin və Baş nazir İrakli Kobaxidzenin şəxsi liderliyi olmadan mümkün olmazdı. Mən statistikanın fövqündə duran bir fikri vurğulamaq istəyirəm. Ölkələrimizin uğuru qarşılıqlı şəkildə bir-birindən asılıdır. Bu dəhlizlə daşınan hər ton yük ölkələrimizin birlikdə qurduğu işlərin davamlı və dayanıqlı olduğunun sübutudur”, - deyə nazir əlavə edib.