Türkiyə KİV-ləri Azərbaycan Xalq Cümhuriyyətinin ildönümünü geniş işıqlandırıblar - FOTOLAR

NUHÇIXAN xəbər verir ki, Türkiyənin aparıcı KİV-ləri Azərbaycan Xalq Cümhuriyyətinin yaranmasının 101-ci ildönümünü ilə bağlı məlumatlar yayıblar. Azərbaycan Respublikasının Prezidenti İlham Əliyevin Azərbaycan Xalq Cümhuriyyətinin şərəfinə paytaxt Bakının İstiqlaliyyət küçəsində ucaldılmış abidəni Respublika Günü münasibətilə ziyarət etməsi KİV-lərdə əsas xəbərlərdən biri kimi təqdim olunub. Həmçinin 28 May - Respublika Günü münasibətilə dövlət başçılarının Prezident İlham Əliyevə ünvanladıqları təbriklərdən bəhs olunub. Türkiyə KİV-ləri Azərbaycan Xalq Cümhuriyyətinin yaranmasını ortaq milli sərvətimiz kimi dəyərləndirib.

Cümhuriyyətin 101-ci ildönümü ilə əlaqədar Türkiyədəki təhsil ocaqlarında və dərnəklərdə çoxsaylı mərasimlər təşkil olunub. Prezident Rəcəb Tayyib Ərdoğan rəsmi Tvitter səhifəsində təbriklərini belə çatdırıb: “Azərbaycan Respublikasının yaranmasının 101-ci ildönümünü ən ülvi hisslərlə təbrik edirəm. Dost və qardaş Azərbaycan xalqına, Prezident İlham Əliyev qardaşıma şəxsən öz adımdan və xalqımız adından sevgilərimi və salamlarımı göndərirəm”.

KİV-lərdə yayılan informasiyalarda Azərbaycan Xalq Cümhuriyyətinin yaranmasının 101-ci ildönümü ilə bağlı mərasimlərə də geniş yer verilib.

Xəbər agentlikləri, çoxtirajlı qəzetlər, televiziya kanalları və müxtəlif portallar Cümhuriyyətimizin tarixi və müasir Azərbaycan dövləti barədə geniş məlumatlar yayıb.