Milli Məclisə seçkilərdə səsvermə 5573 məntəqədə keçiriləcək

Azərbaycanda Milli Məclisə fevralın 9-da keçiriləcək seçkilərdə səsvermə 5573 məntəqədə aparılacaq.

NUHÇIXAN xəbər verir ki, bunu Secki-2020.az saytına açıqlamasında MSK Katibliyinin Media və ictimai əlaqələr şöbəsinin müdiri Şahin Əsədli bildirib.

Qeyd edək ki, səsvermə, ümumilikdə, 125 dairəni əhatə edəcək. Ölkə üzrə səsvermə səhər saat 08:00-da başlayacaq və axşam saat 19:00-dək davam edəcək.

Seçkilərlə əlaqədar Mərkəzi Seçki Komissiyasının qərarı ilə 5 milyon 387 min 600 ədəd seçki bülleteni çap olunub.

Parlament seçkilərində Vətəndaşların Əmək Hüquqlarının Müdafiə Liqası ABŞ-ın “AJF&Associates İnc.” təşkilatı ilə, “İnsan Hüquqları XXI əsr – Azərbaycan” Fondu Fransanın “Opinion Way” Sosioloji Tədqiqatlar İnstitutu ilə birgə, həmçinin “Rəy” Monitorinq Mərkəzi “exit poll” keçirəcək qurumlar kimi qeydə alınıb.