Naxçıvan və Lvov şəhərləri arasında əməkdaşlıq sazişi imzalanıb

Xarici İşlər Nazirliyinin Naxçıvan Muxtar Respublikasındakı idarəsindən NUHÇIXAN-a verilən məlumata görə, yanvarın 31-də Kiyevdə Azərbaycan Respublikası ilə Ukrayna arasında iqtisadi əməkdaşlıq məsələləri üzrə Hökumətlərarası Birgə Komissiyanın 12-ci iclası keçirilib.

İclas çərçivəsində “Lvov Vilayəti Dövlət Administrasiyası (Ukrayna) və Naxçıvan Muxtar Respublikasının Naxçıvan Şəhər İcra Hakimiyyəti (Azərbaycan Respublikası) arasında əməkdaşlıq haqqında Saziş” imzalanmışdır. Sazişi Naxçıvan Muxtar Respublikasının Naxçıvan Şəhər İcra Hakimiyyəti adından ölkəmizin Ukraynadakı fövqəladə və səlahiyyətli səfiri Azər Xudiyev və Ukrayna tərəfdən Lvov vilayəti Dövlət Administrasiyası adından isə bu ölkənin Azərbaycandakı səfiri Vladislav Kanevski imzalayıb.

Sazişdə Naxçıvan və Lvov arasında iqtisadiyyat, ticarət, səhiyyə, təhsil, mədəniyyət və turizm sahələrində əməkdaşlığın inkişaf etdirilməsi, qarşılıqlı işgüzar görüşlərin keçirilməsi və təcrübə mübadiləsinin aparılması nəzərdə tutulur.