Yunanıstan və Albaniya KİV-lərində Xocalı soyqırımından bəhs edən məqalələr dərc olunub - FOTOLAR

Xocalı soyqırımının 28-ci ildönümü Yunanıstan və Albaniyanın kütləvi informasiya vasitələri tərəfindən geniş işıqlandırılır.

NUHÇIXAN xəbər verir ki, dərc olunan məqalələrdə Ermənistanın Azərbaycana qarşı yürütdüyü işğalçılıq və etnik təmizləmə siyasəti, ötən əsrin ən dəhşətli faciələrindən sayılan Xocalı soyqırımının qurbanları haqqında yerli oxuculara ətraflı məlumat verilir. Erməni təcavüzkarlarının Azərbaycan xalqına qarşı törədikləri bu soyqırımı nəticəsində 613 nəfərin, o cümlədən 106 qadının, 63 uşağın qətlə yetirildiyi, 1275 dinc sakinin əsir götürüldüyü, 155 nəfərin taleyindən isə hələ də xəbər olmadığı qeyd olunur. Bəşəriyyətə qarşı törədilmiş ən ağır cinayətlərdən biri olan Xocalı soyqırımının BMT-nin Soyqırımı Cinayətlərinin Qarşısının Alınması və Cəzalandırılması haqqında Konvensiyasının, Vətəndaş və Siyasi Hüquqlar barədə Beynəlxalq Sazişin, Fövqəladə Vəziyyətlərdə və Hərbi Münaqişələr Zamanı Qadınların və Uşaqların Müdafiəsi Bəyannaməsinin müddəalarının kobud şəkildə pozulması hesab edilir.

Eyni zamanda, Heydər Əliyev Fondunun vitse-prezidenti Leyla Əliyevanın təşəbbüsü ilə başladılan “Xocalıya ədalət!” kampaniyasının soyqırımı həqiqətlərin dünya ictimaiyyətinə çatdırılmasında mühüm rolundan bəhs olunur. Bildirilir ki, Xocalı soyqırımının beynəlxalq aləmdə tanıdılması və obyektiv qiymətin verilməsi istiqamətində davamlı işlər aparılır. Bu faciə dünyanın 10-dan çox ölkəsi və ABŞ-ın 20-dən çox ştatı tərəfindən soyqırımı kimi tanınır və qəti şəkildə pislənilir.

Qeyd edək ki, Qafqaz Müsəlmanları İdarəsi sədrinin Azərbaycandakı dini konfessiya rəhbərləri ilə birgə imzaladığı Xocalı soyqırımı ilə bağlı bəyanat ortodoks xristianlarının oxucu kütləsinin sayına görə Yunanıstanda ən böyük elektron KİV-i olan vimaorthodoxias.gr saytında işıqlandırılıb.