Təbrizdə Xocalı soyqırımının 28-ci ildönümü qeyd olunub
NUHÇIXAN xəbər verir ki, fevralın 22-də Azərbaycan Respublikasının Təbrizdəki Baş Konsulluğunda Xocalı soyqırımının 28-ci ildönümü ilə əlaqədar anım tədbiri keçirilib.
Əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib.
Azərbaycan Respublikasının Təbrizdəki Baş konsulu Əliyənnağı Hüseynov çıxış edərək erməni təcavüzkarları tərəfindən 1992-ci il fevralın 26-da Xocalı şəhərində azərbaycanlılara qarşı soyqırımı törədildiyini bildirib, faciənin başvermə səbəblərindən danışıb. Qeyd olunub ki, soyqırımına ilk dəfə ümummilli liderimiz Heydər Əliyev tərəfindən hüquqi-siyasi qiymət verilmiş və Xocalı həqiqətləri dünya ictimaiyyətinə çatdırılıb. Baş konsul ölkə Prezidenti cənab İlham Əliyevin rəhbərliyi ilə aparılan məqsədyönlü xarici siyasət nəticəsində dünyanın bir sıra dövlətləri və beynəlxalq təşkilatlar tərəfindən soyqırımının tanıdıldığını bildirib.
Sonra Xocalı soyqırımının dəhşətlərindən və “Xocalıya ədalət!” kampaniyası çərçivəsində görülən işlərdən bəhs edən film nümayiş etdirilib. Həmçinin mərasim iştirakçılarına faciəni əks etdirən videomateriallar, kitab, jurnal və bukletlər paylanılıb, soyqırımına həsr olunan fotostendə baxış olub, ehsan süfrəsi açılıb.
Mərasimdə İran İslam Respublikası Şərqi Azərbaycan Vilayətinin Baş Mədəniyyət və İslami İrşad İdarəsi baş direktorunun birinci müavini Əli Piruzməneş, Şərqi Azərbaycan Vilayəti Mətbuat Evinin rəhbəri Murtəza Şəfii, İran İslam Respublikası Xarici İşlər Nazirliyinin Şimal-Qərb nümayəndəliyinin rəhbəri Əkbər İsazadə, Türkiyənin Təbrizdəki Baş Konsulluğunun əməkdaşları və ictimaiyyətin nümayəndələri iştirak ediblər.
Təbriz şəhərində nəşr olunan “Sorxab” qəzetinin 20 fevral tarixli nömrəsində “Dünya ictimaiyyətinə çağırış: Xocalıya ədalət!” başlıqlı məqalə dərc olunub.