Avstraliya Xarici İşlər Nazirliyi Dağlıq Qarabağda keçirilmiş saxta seçkilərə münasibətini bir daha açıqlayıb

Avstraliya Xarici İşlər Nazirliyi bu yaxınlarda separatçı rejim tərəfindən Dağlıq Qarabağda keçirilmiş saxta seçkilərə münasibətini bir daha açıqlayıb.

NUHÇIXAN İnformasiya Agentliyi xəbər verir ki, bu barədə jurnalistlərə açıqlamasında Avstraliya Azərbaycanlıları Assosiasiyasının sədri Mikayıl Oyta məlumat verib. Assosiasiyanın sədri bildirib ki, Xarici İşlər Nazirliyinin diaspor təşkilatının mövzuya dair məktubuna göndərdiyi cavabda Avstraliya hökumətinin Azərbaycanın işğal altında olan Dağlıq Qarabağ ərazisi ilə bağlı ümumi mövqeyi öz əksini tapıb. Belə ki, məktubda Avstraliya hökumətinin Azərbaycanın ərazi bütövlüyünü dəstəklədiyi və Dağlıq Qarabağı müstəqil qurum kimi tanımadığı vurğulanıb.

Məktubda deyilir: “Biz 2020-ci il martın 31-də keçirilən saxta seçkiləri, həmçinin onun təşkili ilə bağlı konstitusiya və hüquqi çərçivəni tanımırıq. Bir az da irəli gedərək bildirmək istəyirik ki, Avstraliya ATƏT-in Minsk qrupu çərçivəsində sülh prosesinə göstərilən cəhdləri dəstəkləyir. Proseslə əlaqədar icmalar və hökumətlər arasında keçirilən dialoqu məsələnin sülh yolu ilə həlli üçün ən düzgün yol hesab edir”.