BƏƏ koronavirusla mübarizə üçün Azərbaycana tibbi yardım göndərib

Birləşmiş Ərəb Əmirlikləri (BƏƏ) Azərbaycana koronavirus infeksiyasının (COVID-19) yayılmasının qarşısının alınması üzrə səylərini dəstəkləmək üçün təyyarə ilə 11 ton tibbi ləvazimat göndərib.

NUHÇIXAN İnformasiya Agentliyi "Gulf Today"ə istinadən verdiyi məlumata görə, bu addım koronavirusa qarşı mübarizə aparan təxminən 11 min tibb işçisinə kömək edəcək.

Yardımın göndərilməsini şərh edən BƏƏ-nin Azərbaycandakı səfiri Məhəmməd Əl Qubeysi qeyd edib ki, onun ölkəsi və Azərbaycan arasında münasibətlər bir çox sahələrdə fəal inkişaf edir:

"Bu, iki ölkə rəhbərliyinin ortaq görüşü, ümumi maraq doğuran bir çox regional və beynəlxalq məsələlərdə və müxtəlif beynəlxalq forumlarda əlaqələrin, dostluq, anlaşma və qarşılıqlı dəstəyin möhkəmləndirilməsin ilə təsdiqlənir".

Səfir əlavə edib ki, bu gün təyyarə ilə tibbi yardımın göndərilməsi, BƏƏ rəhbərliyinin müxtəlif vəziyyətlərdə, xüsusən də dünyanın hazırkı pandemiya ilə mübarizədə qarşılaşdığı çətinliklər fonunda dost ölkələrə dəstəyinin gösətircisidir:

Qeyd edilir ki, BƏƏ bu günədək 67 ölkəyə 946 ton yardım göndərib və nəticədə 946 mindən çox tibb işçisinə dəstək göstərib.