Şəhid general-mayor Polad Həşimovla ata ocağında vida mərasimi keçirilib - FOTOLAR
İyulun 13-dən 14-ə keçən gecə düşmən Azərbaycan-Ermənistan dövlət sərhədinin Tovuz istiqamətindəki mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib. Həmin ərazidə baş verən şiddətli döyüşlər zamanı şəhid olan Azərbaycan Ordusunun general-mayoru, 1975-ci il təvəllüdlü Polad Həşimovun nəşi bu gün doğulduğu Qəbələ rayonuna gətirilib.
NUHÇIXAN İnformasiya Agentliyinin məlumatına görə, şəhidin cənazəsi ata ocağında böyük coşqu ilə qarşılanıb. Cənazə namazının qılınması mərasimində minlərlə adam toplaşıb.
Mərasimdə Müdafiə Nazirliyinin nümayəndələri, rayon icra hakimiyyətinin rəhbərliyi, hərbçilər, ehtiyatda olan zabitlər və rayon ictimaiyyəti iştirak edib.
Müdafiə Nazirliyinin mətbuat xidmətinin rəhbəri, polkovnik Vaqif Dərgahlı, şəhidin hərbiçi yoldaşları çıxış edərək, onun 1992-ci ildən bəri keçdiyi şərəfli döyüş yolundan, göstərdiyi qəhrəmanlıqlardan, xatirələrindən danışıblar. Çıxışlarda Polad Həşimovun döyüş yolunun gənclərə nümunə olduğu diqqətə çatdırılıb. Vurğulanıb ki, Vətən uğrunda şəhid olanların xatirəsi heç vaxt unudulmur və daim əziz tutulur.Generalın ailə üzvləri adından çıxış edən qardaşı İlham Həşimov və oğlu Davud Həşimov şəhidlə bağlı xatirələrini bölüşüb. Düz 28 il öncə C.Naxçıvanski adına Hərbi Liseydə oxuyarkən 18 yaşlı kursant Polad Həşimov Dağlıq Qarabağda baş verən müharibənin qızğın vaxtında Ağdam və Murovdağ istiqamətində gedən döyüşlərdə iştirak edib, 2003-cü ildə "Azərbaycan Bayrağı" ordeni, 2016-cı ildə baş verən aprel döyüşlərində göstərdiyi şücaətə görə dövlətimizin başçısı İlham Əliyev tərəfindən 2 ci dərəcəli "Vətənə xidmətə görə" ordeni ilə təltif edilib, 2019-cu ildə ona general-mayor rütbəsi verilib. Polad Həşimovun ölümü nəinki Qəbələ rayonu, bütün Azərbaycan xalqı üçün böyük bir itgidir və o fəxr olunası qəhrəmanımızdı.
Daha sonra şəhid generalın cənazəsi Azərbaycan bayrağı altında, böyük insan izdihamında “Şəhidlər ölməz, Vətən bölünməz” şüarı ilə Qəbələdən Bakıya yola salınıb. Şəhid Polad Həşimovun nəşi sabah Bakıda İkinci Fəxri Xiyadanda torpağa tapşırılacaq.
Şəhidin bir qız və iki oğul övladı var.
Allah rəhmət eləsin.