Aleksandr Oxrimenko: Ermənistanın Azərbaycanın işğal olunmuş ərazilərində süni məskunlaşma aparması beynəlxalq hüququn prinsiplərinə ziddir

Azərbaycanın işğal edilmiş ərazilərində qeyri-qanuni məskunlaşdırma prosesi, xüsusilə Livandan olan ermənilərin bu torpaqlara köçürülməsi Ermənistan hakimiyyətinin siyasətinin dalana dirəndiyinin göstəricisidir.

NUHÇIXAN İnformasiya Agentliyi xəbər verir ki, bu sözləri AZƏRTAC-a məxsusi açıqlamasında Ukrayna Analitika Mərkəzinin rəhbəri, ekspert Aleksandr Oxrimenko söyləyib.

Ekspert deyib ki, Ermənistanın Azərbaycanın işğal olunmuş ərazilərində süni məskunlaşma aparması beynəlxalq hüququn prinsiplərinə ziddir və təxribatdır. Bu, həmin torpaqlarda yaşayan əvvəlki sakinlərlə sonradan köçürülən insanlar arasında qarşıdurma yarada bilər. Ermənistanın işğal etdiyi ərazilərdə Azərbaycan vətəndaşlarının əmlak hüquqları qüvvədədir. Bu siyasət münaqişənin dərinləşməsinə şərait yarada bilər.

Ekspert hesab edir ki, Ermənistanın bu siyasəti onun BMT Təhlükəsizlik Şurasının Dağlıq Qarabağ münaqişəsi ilə bağlı qəbul etdiyi 4 qətnamənin tələblərini yerinə yetirmək fikrindən uzaq olduğunu göstərir. Beynəlxalq birlik bu məsələyə ciddi fikir verməlidir. Ermənistan BMT Təhlükəsizlik Şurasının qətnamələrinin tələblərini yerinə yetirməyə məcbur edilməlidir. Dağlıq Qarabağ münaqişəsinin həlli ilə məşğul olan ATƏT-in Minsk prinsipial mövqeyini ortalığa qoymalıdır.