Özbəkistan portalları Ermənistanın Azərbaycana qarşı son təxribatlarını pisləyən məqalələr çap edib

Özbəkistanın tnews.uz və qalampir.uz portalları özbək və rus dillərində Ermənistanın Azərbaycana qarşı son təxribatlarını pisləyən məqalələr çap edib.

NUHÇIXAN İnformasiya Agentliyi xəbər verir ki, tnews.uz portalında verilən məqalədə sentyabrın 27-də saat 06:00-dan başlayaraq Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrini iriçaplı silahlar, minaatanlar və müxtəlif çaplı artilleriya qurğularından intensiv atəşə tutduğu bildirilir.

Materialda vurğulanır ki, Tərtər rayonunun Qapanlı, Ağdam rayonunun Çıraqlı və Orta Qərvənd, Füzuli rayonunun Alxanlı və Şükürbəyli, Cəbrayıl rayonunun Cocuq Mərcanlı kəndlərinin intensiv atəşə tutulması nəticəsində mülki əhali arasında həlak olan və yaralananlar var.

Qalampir.uz portalı Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevə zəng etməsi haqqında məlumat verib. Qeyd olunur ki, Rəcəb Tayyib Ərdoğan həmişə olduğu kimi, bu gün də Türkiyənin Azərbaycanın yanında olduğunu vurğulayıb.