Qardaş Türkiyənin hər bölgəsində Azərbaycan bayrağı dalğalanır - FOTOLAR

Sentyabrın 27-dən başlayaraq Ermənistan silahlı qüvvələri tərəfindən edilən təxribatlar və buna cavab olaraq şanlı Azərbaycan Ordusunun əks-hücumu nəticəsində əldə etdiyimiz uğurlar qardaş Türkiyənin hər bölgəsində böyük təntənə ilə qeyd edilir.

NUHÇIXAN İnformasiya Agentliyi xəbər verir ki, artıq bir neçə gündür Türkiyənin hər bölgəsinin tarixi rəmzləri Azərbaycan bayrağının rəngləri ilə işıqlandırılır, dövlət idarələrinin və ali təhsil müəssisələrinin binalarının üzərində şanlı bayrağımız dalğalandırılır. Bir çox vilayətlərin ictimai nəqliyyatının elektron tablolarında iki qardaş ölkənin bayraqları ilə yanaşı, “Bir millət, iki dövlət!” şüarı da əks olunur, küçələrdə xüsusi dəstək şüarları asılır. Türkiyənin bir çox məscidlərində şəhid olmuş qəhrəman oğullarımızın ruhuna dualar oxunur, ehsanlar paylanır. Qardaş ölkənin müxtəlif bölgələrində və sosial media hesablarında dəstək aksiyaları keçirilir. Türkiyənin məşhur sənətçiləri də qardaş Azərbaycanla həmrəy olduqlarını bütün dünyaya nümayiş etdirirlər.