Prezident İlham Əliyev: Atəşkəs birtərəfli proses deyil və biz baxarıq, görək erməni tərəfi özünü necə aparır

Biz yəqin etməliyik ki, onlar danışıqlar prosesini imitasiya etmək cəhdlərindən əl çəkiblər, təhrikçi əməllərdən, bəyanatlardan çəkiniblər və nizamlama yolunun tapılması məqsədinə sadiqdirlər.

NUHÇIXAN İnformasiya Agentliyi xəbər verir ki, Prezident İlham Əliyev bu barədə Rusiyanın RBK telekanalına müsahibəsində bildirib.

Dövlətimizin başçısı qeyd edib ki, ikinci əsas amil danışıqlar masası arxasında Ermənistanın konstruktiv yanaşmasının olmasıdır.

"Son bir il ərzində erməni tərəfindən gördüklərimiz məhz danışıqlar prosesini pozmağa və məsuliyyəti Azərbaycanın üzərinə qoymağa yönəlmişdi. Buna görə də baxarıq, biz öz bəyanatlarımıza sadiqik, Azərbaycan öz üzərinə götürdüyü öhdəlikləri həmişə yerinə yetirən ölkədir. Mən həmişə demişəm ki, bizim imzamız da sözümüz kimi əhəmiyyətlidir. Lakin atəşkəs birtərəfli proses deyil və biz baxarıq, görək erməni tərəfi özünü necə aparır”, - deyə Azərbaycan Prezidenti müsahibəsində vurğulayıb.